Ֆուտբոլային սկաուտ․ Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր

Առաջիկա հանգստյան օրերին կվերսկսվի Բունդեսլիգայի առաջնությունը, և ArmSport-ն իր Ֆուտբոլային սկաուտ շարքում այս անգամ կանդրադառնա այս մրցաշրջանում բարձր տեղերի համար պայքարող երկու ակումբների՝ Մյունխենգլադբախի «Բորուսիայի» և Լևերկուզենի «Բայերի» ամենահեռանկարային ֆուտբոլիստներին։

Բրիլ Էմբոլո

🇨🇭 Շվեյցարիա
23 տարեկան
«Բորուսիա Մ․»

Կամերունացի ֆուտբոլիստը, ով շվեյցարական «Բազելի» սան է և ներկայացնում է Շվեյցարիայի ազգային հավաքականը, երեք տարի առաջ տեղափոխվեց Բունդեսլիգա՝ «Շալկե»։ Գելզենկիրխենյան ակումբի կազմում անցկացրած երեք մրցաշրջաններում երիտասարդ հարձակվողը այդպես էլ չփայլեց արդյունավետությամբ՝ 3 մրցաշրջանում ընդհանուր առմամբ աչքի ընկնելով 10 անգամ՝ Բունդեսլիգայի շրջանակներում։ Սակայն այս մրցաշրջանում, տեղափոխվելով Մյունխենգլադբախի «Բորուսիա», նա միանգամից դարձավ թիմի առանցքային ֆուտբոլիստներից մեկը և արդեն իսկ հասցրել է աչքի ընկնել 7 խփած գնդակներով։ Ֆուտբոլիստը, կարելի է ասել, սկսել է ամեն ինչ մաքուր էջից և հետագայում ևս նման խաղ շարունակելով ցուցադրել՝ նա կարող է դառնալ Եվրոպայի լավագույն հարձակվողներից մեկը։

Լեոն Բեյլի

🇯🇲 Ճամայկա
22 տարեկան
«Բայեր»

Արագավազ ճամայկացին արդեն 4-րդ մրցաշրջանն է անցկացնում «դեղագործների» կազմում։ Երբ նա ժամանակին «Գենկից» տեղափոխվեց գերմանական ակումբ 13,5 մլն եվրոյով, շատերի մոտ դա զարմանք առաջացրեց, սակայն ներկայումս ֆուտբոլիստը 4-5 անգամ ավելի թանկ արժե և «Բայերը», իհարկե, համապատասխան առաջարկի դեպքում պատրաստ է բաժանվել Լեոնից, սակայն մյուս կողմից․․․ առանց Բեյլիի այնքան դժվար է պատկերացնել ներկայիս «Բայերը», նա հանդիսանում է թիմի շարժիչը, ամենավտանգավոր ֆուտբոլիստներից մեկը։ Բայց մյուս կողմից՝ Բեյլին արդեն շատ է հասունացել որպես ֆուտբոլիստ, և ժամանակն է արդեն իսկ ուժերը փորձել որևէ գրանդ ակումբի կազմում։ Ներկա դրությամբ նրա ծառայություններով հետաքրքրված են «Չելսին» և «Բավարիան»․․․

Մարկուս Թյուրամ

🇫🇷 Ֆրանսիա
22 տարեկան
«Բորուսիա Մ․»

Ծանոթ ազգանուն է՞․․․ այո-այո, չեք սխալվում, նա ֆրանսիացի լեգենդար պաշտպան Լիլիան Թյուրամի որդին է: Մարկուսը «Սոշոյի» սան է, իսկ երեք տարի առաջ նա տեղափոխվեց «Գենգամ»։ Սկզբում բոլորը դիտարկում էին նրան որպես լեգենդար պաշտպանի որդի, սակայն դա արդարացի չէր, քանի որ կրտսեր Թյուրամը խաղում էր հարձակման գծում։ Եվ ահա, 2018/19 մրցաշրջանում Մարկուսը դառնում է 9 գոլի հեղինակ Լիգա 1-ի առաջնությունում՝ իր վրա գրավելով մի շարք բարձրակարգ ակումբների ուշադրությունը։ Ամենահամառը մյունխենգլադբախցիներն էին, ովքեր 9 մլն վճարեցին երիտասարդ հարձակվողի տրանսֆերի դիմաց․ և նրանք չսխալվեցին։ Ֆրանսիացին, ինչպես մեր մյուս այսօրվա հերոսը՝ Էմբոլոն, արագ ընտելացավ նոր թիմի խաղաոճին և այժմ ևս հանդիսանում է իր թիմի առաջատարներից մեկը։ Ֆուտբոլային համառությամբ ու բնաշնորհ տաղանդով օժտված ֆուտբոլիստի դեպքում կարելի է ասել՝ պտուղը ծառից հեռու չի ընկնում։

Կայ Հավերց

🇩🇪 Գերմանիա
20 տարեկան
«Բայեր»

Եթե Բունդեսլիգայում չխաղար Ջեյդոն Սանչոն, իսկ այժմ նաև Հոլանդը, ապա Հավերցին, ամենայն հավանականությամբ, կարելի կլիներ համարել առաջնության լավագույն երիտասարդ ֆուտբոլիտը։ Սակայն դա ամենևին չի նվազեցնում նրա տաղանդն ու հեռանկարային լինելը․ Հավերցը ներկա դրությամբ «Բայերի» առաջատարներից է՝ ընդամենը 20 տարեկան հասակում։ Խելացի, տեխնիկապես լավ զինված, առաջնորդի հատկանիշներով օժտված ֆուտբոլիստը չի կարող երկար մնալ ստվերում և պատահական չէ, որ գերմանական գլխավոր գրանդը՝ «Բավարիան», արդեն իսկ փորձում է իր ճամբար հրավիրել Հավերցին։ Խնդիրը միայն նրա բարձր տրանսֆերային արժեքն է, իսկ ներկայիս պայմաններում հավանաբար ոչ մի թիմ պատրաստ չի լինի մոտ 100 մլն եվրո վճարել մեկ ֆուտբոլիստի համար։ Սակայն շատերը երևի գիտեն, թե ինչպես է «Բավարիան» հասնում իր ուզածին ներքին առաջնությունում, այնպես որ, սպասենք․․․

Դենիս Զակարիա

🇨🇭 Շվեյցարիա
23 տարեկան
«Բորուսիա Մ․»

Դենիսի մասին բավականին քիչ է խոսվում, և դա բոլորովին զարմանալի չէ։ Նա հանդես է գալիս հենակետային կիսապաշտպանի դիրքում, իսկ այս դիրքի խաղացողները այդքան էլ նկատելի չեն՝ համեմատած հարձակվողական ոճի ֆուտբոլիստների հետ։ Սակայն, Զակարիան, ով արդեն երրորդ մրցաշրջանն է անցկացնում Մյունխենգլադբախում, արդարացիորեն համարվում է թիմի առաջատարը։ Ֆուտբոլային հսկան (191 սմ հասակ) ինչ-որ տեղ հիշեցնում է ֆրանսիացիներ Պատրի Վիեյրային և Պոլ Պոգբային՝ ասես այս երկու ֆուտբոլիստների խառնուրդը լինի։ Նա ոչ միայն կարողանում է հաջողությամբ չեզոքացնել մրցակիցների գրոհները, այլ նաև բավականին գրագետ կազմակերպում է իր թիմի գրոհները և երբեմն էլ՝ արդյունավետ ավարտին հասցնում այդ գրոհները։ Այսպիսի արագ տեմպերով աճ գրանցելով՝ մեր այսօրվա արդեն երկրորդ շվեյցարացի հերոսը կարող է դառնալ համաշխարհային ֆուտբոլի ապագա աստղերից մեկը։

Վար Բաբայան

Շարքի նախորդ մասերը

Ֆրանսիայի առաջնության գլխավոր բացահայտումները

Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Քեյ-ֆուտբոլի (K-Football) ակնկալիքով

Երիտասարդ աղվեսների ոդիսականը շարունակվում է

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)