Հայաստանի Բարձրագույն խմբի առաջնությունը, ինչպես հայտնի է, այս անգամ անցկացվում է այլ ձևաչափով․ մեդալների համար կարող են պայքարել միայն վեցնյակում տեղ գտած թիմերը։ Այս ձևափաչը ֆուտբոլային գործունեություն իրականացնողների մոտ դժգոհություն էր առաջացրել, ինչից ելնելով էլ՝ ՀՖՖ-ն դիմել է ԲԽ ակումբներին։ Սրա վերաբերյալ պաշտոնական հայտարարություն է տարածել «Շիրակը», որը ներկայացնում ենք ստորև․
«Այսօր Հայաստանի ֆուտբոլի ֆեդերացիան դիմել է Բարձրագույն խմբին մասնակից ակումբներին առաջնության վերսկսման և անցկացման կարգի փոփոխության վերաբերյալ: Մասնավորապես առաջարկել է երկու տարբերակ: Առաջին տարբերակով առաջարկել է պահպանել գործող կարգը, իսկ երկրորդ տարբերակում առաջարկել է առաջնությունը շարունակել ևս մեկ համարժեք երրորդ փուլով՝ բոլոր ինը թիմերի մասնակցությամբ:
«Շիրակ» ֆուտբոլային ակումբը դեմ է արտահայտվել առաջնության ձևաչափի փոփոխությանը, քանի որ այդպիսով խախտվում է արդար մրցակցության սկզբունքը, որի հիման վրա ձևավորվել է թիմերի վեցնյակ, որ շարունակելու են պայքարել չեմպիոնության համար: Եվ նույն սկզբունքով 7-9-րդ տեղերը զբաղեցրած թիմերը դուրս են մնացել այդ պայքարից: Ինչպես, օրինակ, «Շիրակ»-ը դուրս է մնացել ՎԲեթ Գավաթի խաղարկությունից արդար մրցակցային սկզբունքով և այժմ չի վիճարկում ՎԲեթ Գավաթի խաղարկությանը վերականգնվելու հարցը:
Այսպիսով, Ակումբը չի տեսնում որևէ տրամաբանություն և նպատակ Առաջնության հետագա ընթացքում ձևաչափի փոփոխության վերաբերյալ»:
Ընթացիկ առաջնության մրցաշարային աղյուսակում «Շիրակը» 28 միավորով 4-րդ տեղում է։
