Չեմպիոնների լիգայի լիգայի փուլի 4-րդ տուրի՝ «Բարսելոնայի» դեմ արտագնա հանդիպման նախօրեին «Ասթոն Վիլայի» գլխավոր մարզիչ Ունաի Էմերին վերհիշել է 2017 թվականի լեգենդար դիմակայությունը, երբ իր գլխավորած ՊՍԺ-ն, առաջին խաղում հաղթելով 4:0 հաշվով, պատասխան մրցավեճում 1:6 հաշվով զիջեց կատալոնական ակումբին։
Իսպանացի մասնագետը խոստովանել է, որ այդ երեկոն իր համար լուրջ դաս է եղել թե՛ մարզական, թե՛ արտամարզական առումով՝ ընդգծելով, որ այդ ժամանակ ֆուտբոլին օդ ու ջրի պես անհրաժեշտ էր VAR համակարգը։
Նախախաղային մամուլի ասուլիսի ընթացքում լրագրողները Էմերիից հետաքրքրվել են, թե ինչ հետևություններ է նա արել «Կամպ Նոուում» կայացած այդ պատմական հանդիպումից.
«Մարզչական կարիերաս սկսել եմ 2004 թվականին։ Արդեն 22 տարի է՝ այս ոլորտում եմ, որից 16-ի ընթացքում գլխավորածս թիմերն անընդմեջ հանդես են գալիս եվրագավաթներում՝ Չեմպիոնների լիգայում, Եվրոպա լիգայում և Կոնֆերենցիաների լիգայում։ Յուրաքանչյուր խաղից էլ ինչ-որ բան սովորում ես, բայց հատկապես այդ հանդիպումից շատ դասեր քաղեցի՝ ինչպես մարզական, այնպես էլ ոչ մարզական տեսանկյունից։ Այդ պահին ֆուտբոլին պարզապես VAR էր անհրաժեշտ»,- նշել է Էմերին։
Այս հայտարարությամբ իսպանացի մասնագետը հերթական անգամ ակնարկել է գերմանացի մրցավար Դենիզ Այթեքինի վիճահարույց որոշումների մասին, որոնք խաղից հետո բուռն քննադատության արժանացան փարիզյան ակումբի ներկայացուցիչների կողմից։
Այժմ Էմերին կրկին «Կամպ Նոու» է վերադառնում՝ այս անգամ գլխավորելով «Ասթոն Վիլան»։ Մասնագետը բարձր է գնահատել մրցակցի ներկայիս խաղամակարդակը՝ կատալոնացիներին դասելով մրցաշարի գլխավոր հավակնորդների շարքին.
«Եթե առանձնացնելու լինենք Չեմպիոնների լիգայի հինգ գլխավոր ֆավորիտներին, ապա «Բարսելոնան» անկասկած այդ ցանկում է։ Իր լավագույն մարզավիճակում այս թիմն ունակ է պարտության մատնել ցանկացած մրցակցի»,- եզրափակել է Էմերին՝ հավելելով, որ անգլիական ակումբին ծանր փորձություն է սպասվում, սակայն իր սաները վստահ են սեփական ուժերին։
Հիշեցնենք, որ 2017 թվականի փետրվարի 14-ին կայացած Չեմպիոնների լիգայի 1/8 եզրափակչի առաջին խաղում ՊՍԺ-ն սեփական հարկի տակ 4:0 հաշվով ջախջախել էր «Բարսելոնային»։ Թվում էր, թե փարիզյան թիմը վաղօրոք լուծել է քառորդ եզրափակչի ուղեգրի հարցը, սակայն մարտի 8-ին կատալոնական ակումբը կերտեց եվրոպական ֆուտբոլի պատմության ամենահիշարժան ռեմոնտադան։
Լուիս Սուարեսի ու Լիոնել Մեսսիի գոլերի, ինչպես նաև Լևին Կուրզավայի ինքնագոլի շնորհիվ տանտերերը հաշիվը դարձրին 3:0, սակայն 62-րդ րոպեին Էդինսոն Կավանիի խփած գնդակը ՊՍԺ-ին կրկին դիմակայության բացահայտ ֆավորիտ դարձրեց։ Այդուհանդերձ, խաղավերջում «Բարսելոնան» անհավանական կամային որակներ դրսևորեց․ Նեյմարը 88-րդ և 91-րդ րոպեներին դուբլ ձևակերպեց՝ նախ աչքի ընկնելով տուգանային հարվածից, ապա անվրեպ իրացնելով 11-մետրանոցը, իսկ 95-րդ րոպեին Սերժի Ռոբերտոն խփեց հաղթական 6-րդ գնդակը (6:1)։
Հանդիպումից հետո երկար ժամանակ քննարկման առարկա էին դարձել Անխել Դի Մարիայի նկատմամբ Խավիեր Մասկերանոյի չարձանագրված խախտումը և Լուիս Սուարեսի վաստակած կասկածելի 11-մետրանոցը։ Հատկանշական է, որ տեսաօգնականների (VAR) համակարգը Չեմպիոնների լիգայում ներդրվեց միայն երկու տարի անց՝ 2019/20 մրցաշրջանում։
