«Մանչեսթեր Սիթիի» հարձակվող Էրլինգ Հալանդի հայրը՝ Ալֆ-Ինգե Հալանդը, անդրադարձել է անգլիական ակումբի շուրջ ծավալվող ֆինանսական սկանդալին, Պրեմիեր լիգայից հնարավոր հեռացման վտանգին և իր որդու ապագային։
«Ես տեղյակ եմ միայն նրանից, ինչ գրվում է մամուլում։ Իսկ այնտեղ շատ բան է գրվում, ընդ որում՝ չափազանց միակողմանի։ Հետևաբար, մենք հույս ունենք, որ ակումբի գործը արդարացի քննության կարժանանա։ Էրլինգի մտքերը կապված են միայն խաղադաշտում հնարավորինս շատ ժամանակ անցկացնելու հետ, և նա կենտրոնացած է բացառապես ֆուտբոլի վրա»,— Հալանդ ավագի խոսքերն է մեջբերում The Sun-ը։
Ալֆ-Ինգեն նաև նշել է, որ որոշ չափով անարդար կլինի, եթե ներկայիս ֆուտբոլիստները տուժեն տարիներ առաջ տեղի ունեցած իրադարձությունների պատճառով.
«Այո, ինչ-որ առումով անարդար է պատիժ կրել այն բանի համար, ինչն արվել է շատ տարիներ առաջ։ Կարծում եմ՝ պետք է սպասել բողոքարկման գործընթացի ավարտին։ «Սիթիում» վստահ են, որ ունեն ծանրակշիռ ապացույցներ՝ իրենց անմեղությունը հաստատելու համար։ Այնպես որ, արժե սպասել վերջնական որոշմանը»։
Հիշեցնենք, որ «Մանչեսթեր Սիթին» մեղադրվում է 2009-ից 2018 թվականների ընթացքում պարբերաբար թույլ տված ֆինանսական խախտումների մեջ։ 2023 թվականի փետրվարին ԱՊԼ-ն ակումբին առաջադրել էր 115 մեղադրանք։ 2026 թվականի սեպտեմբերին գործը քննող անկախ հանձնաժողովը «քաղաքայիններին» մեղավոր է ճանաչել 115 կետից 114-ով, ինչից հետո ակումբը բողոքարկել է վճիռը։
