Իտալիայի ֆուտբոլի ֆեդերացիայի նախագահ Ջովանի Մալագոն պաշտոնապես հայտարարել է «Միլանի» լեգենդար նախկին պաշտպան Պաոլո Մալդինիին ազգային հավաքականի տեխնիկական տնօրենի պաշտոնում նշանակելու մասին։
Բացի Մալդինիից, ազգային թիմի ղեկավար կազմում կընդգրկվի նաև Բրազիլիայի հավաքականի և «Միլանի» նախկին կիսապաշտպան, ՊՍԺ-ի նախկին մարզական տնօրեն Լեոնարդոն։ Վերջինս կզբաղեցնի խորհրդականի պաշտոնը։ Նշենք, որ Մալդինին ու Լեոնարդոն արդեն ունեն համատեղ աշխատանքի փորձ. նրանք 2018-2019 թվականներին ընդգրկված են եղել «Միլանի» ղեկավար կազմում։
«Հաճույքով տեղեկացնում եմ, որ Պաոլո Մալդինին ընդունել է տեխնիկական տնօրեն դառնալու մեր առաջարկը։ Նա իր պարտականությունները կկատարի Լեոնարդոյի հետ համատեղ, որը հանդես կգա որպես խորհրդական»,- նշել է Մալագոն հայտարարության մեջ։
Իտալական ֆուտբոլում արմատական փոփոխությունների և նոր նշանակումների անհրաժեշտությունն առաջացավ այն բանից հետո, երբ 2026 թվականի մարտին Իտալիայի հավաքականը ԱԱ-2026-ի անցումային խաղերի եզրափակիչում հետխաղյա 11-մետրանոցներով զիջեց Բոսնիա և Հերցեգովինային (1:1, 1:4)։ Այս պարտության պատճառով աշխարհի քառակի չեմպիոններն արդեն երրորդ անգամ անընդմեջ դուրս մնացին Մունդիալից (վերջին անգամ իտալացիները ԱԱ-ին մասնակցել են 2014-ին՝ լքելով պայքարը խմբային փուլում)։
Պատմական ֆիասկոյից հետո գլխավոր մարզիչ Ջենարո Գատուզոն, որը թիմը գլխավորում էր 2025 թվականի հունիսից, ապրիլին հեռացվեց զբաղեցրած պաշտոնից, իսկ Իտալիայի ֆուտբոլի ֆեդերացիայի նախկին ղեկավար Գաբրիելե Գրավինան հրաժարական տվեց: Ներկա պահին «Սկուադրա աձուրան» չունի մշտական գլխավոր մարզիչ. վերջին ընկերական խաղերում թիմը ղեկավարել է գլխավոր մարզչի պաշտոնակատար Սիլվիո Բալդինին։
Պաոլո Մալդինին (58 տարեկան) իր ողջ ֆուտբոլային կարիերան անցկացրել է «Միլանում»՝ դառնալով Իտալիայի յոթակի չեմպիոն և Չեմպիոնների լիգայի/Եվրոպական չեմպիոնների գավաթի հնգակի գավաթակիր: Իտալիայի ազգային հավաքականի կազմում նա դարձել է ԱԱ-1994-ի արծաթե և ԱԱ-1990-ի բրոնզե մեդալակիր, ինչպես նաև Եվրո-2000-ի փոխչեմպիոն։
Լեոնարդոն Աշխարհի 1994 թ. չեմպիոն է և 1998 թ. փոխչեմպիոն: Որպես մարզիչ գլխավորել է «Ինտերն» ու «Միլանը», աշխատել է նաև որպես ՊՍԺ-ի մարզական տնօրեն:
