Ֆրանսիայի հավաքականի գլխավոր մարզիչ Դիդիե Դեշամը մեկնաբանել է ԱԱ-2026-ի խմբային փուլի 2-րդ տուրի՝ Իրաքի դեմ հանդիպման ընդհատումը, որի պատճառն ամպրոպի և կայծակի վտանգն էր։
Ֆիլադելֆիայում ընթացող հանդիպման առաջին խաղակեսից հետո (որն ավարտվել է 1:0 հաշվով՝ շնորհիվ Կիլիան Մբապեի գոլի) ֆուտբոլիստները խաղադաշտ չեն վերադարձել։ Մարզադաշտի մեծ էկրաններին հայտնվել է ամպրոպի վտանգի մասին հաղորդագրություն, իսկ երկրպագուներին հորդորել են լքել իրենց տեղերը տրիբունաներում։
Ֆրանսիական RMC Sport պարբերականի եթերում Դիդիե Դեշամը խոսել է ստեղծված անորոշ իրավիճակի մասին.
«Եղանակի պատճառով ընդհատո՞ւմը։ Նախազգուշացում եղավ, հետո այն անհետացավ, հետո նորից հայտնվեց… Ես դադարեցրել եմ ֆուտբոլիստներին [խաղի վերսկսման մասին] նորություններ հայտնել, քանի որ դրանք փոխվում են յուրաքանչյուր 30 վայրկյանը մեկ: Մենք սպասում ենք… Այստեղ ամենակարևորն այն է, որ ժամանակ ունենանք նորից նախավարժանք անելու և խաղային ռիթմի մեջ մտնելու համար»,- նշել է մասնագետը։
Խոսելով բուն խաղի մասին՝ Ֆրանսիայի հավաքականի գլխավոր մարզիչն ընդգծել է, որ թիմը դեռ շտկելու բաներ ունի.
«Մենք հաղթում ենք, թեև կարող էինք մեծացնել առավելությունը։ Հենց մենք արագություն ենք հաղորդում խաղին՝ օգտագործելով եզրերը, մրցակիցը խնդիրներ է ունենում:
Ցավոք, տեղաշարժերի պատճառով մենք երբեմն չափազանց շատ մարդ էինք կուտակում կենտրոնում։
Կային լավ դրվագներ, բայց կան նաև այլ բաներ… Խոսքը հիմնականում հարձակվողական գծի խաղացողների դիրքային շտկումների մասին է՝ բոլոր գոտիները զբաղեցնելու համար, թեև գիտեմ, որ նրանք բոլորն էլ ցանկանում են գնդակով լինել»:
Անձրևը փոքր-ինչ հանդարտվել է, և հանդիսատեսն աստիճանաբար վերադառնում է տրիբունաներ, սակայն ֆուտբոլիստները դեռևս հանդերձարաններում են: Պաշտոնական անձինք հայտնել են, որ ընդմիջումը նախատեսված 15-ի փոխարեն կտևի առնվազն 30 րոպե: Նախնական տվյալներով՝ երկրորդ խաղակեսը կմեկնարկի նախատեսվածից մոտ մեկ ժամ ուշացումով։
