«Մանչեսթեր Սիթիի» և Բելգիայի հավաքականի վինգեր Ժերեմի Դոկուն հայտնվել է բուռն քննարկումների կենտրոնում այն բանից հետո, երբ հայտարարել է ԱԱ-2026-ի ընթացքում ազգային ընտրանու ճամբարը լքելու ցանկության մասին։ Ֆուտբոլիստը մտադիր է մեկնել կնոջ մոտ՝ ներկա գտնվելու իրենց երեխայի ծննդաբերությանը:
Այս որոշումը ոչ բոլորն են ըմբռնումով ընդունել։ L’Équipe de choc ծրագրի եթերում ֆրանսիացի լրագրող Ֆրանս Պիեռոնը կոշտ քննադատության է ենթարկել բելգիացի ֆուտբոլիստին:
Եթերում գլխավոր քննարկման թեման ձևակերպված էր այսպես. «Արդյո՞ք կարելի է լքել աշխարհի առաջնությունը հանուն երեխայի ծննդյան: ԱԱ-ն ավելի՞ կարևոր է, քան ծննդաբերությունը»:
Պիեռոնն անմիջապես հայտնել է իր դիրքորոշումն ու նշել, որ բացարձակապես չի հասկանում Դոկուի որոշումը.
«Սա ինձ վրդովեցնում է։ Չգիտեմ՝ պատճառն այն է, որ ես կին եմ, թե պարզապես մի փոքր տարօրինակ եմ ու անսիրտ, բայց ես դա չեմ հասկանում։
Պետք է գիտակցել, որ ԱԱ-ին մասնակցելը իսկապես բացառիկ շանս է ու անհավանական երջանկություն. հարյուրավոր ֆուտբոլիստներ կսպանեին քո տեղում լինելու համար: Հնարավոր է՝ սա քո կյանքում այլևս երբեք չկրկնվի։ Սա յուրահատուկ պահ է, մանկական երազանք, որն իրականացնում ես։ Ու դու պատրաստվում ես այս ամենը թողնել՝ երեխայիդ ծննդյանը ներկա լինելու համա՞ր… Ներեցեք ինձ, բայց դա մի պահ է, երբ հայրն ուղղակի անպիտան է, նա ընդամենը ստատիստի դեր ունի»։
Տաղավարի մյուս հյուրերը, սակայն, չեն կիսել լրագրողի կարծիքը։ Նախկին հայտնի բռնցքամարտիկ Բրահիմ Ասլումը հակադարձել է. «Ինչպե՞ս թե ոչնչի համար պետք չենք: Բա ո՞վ է աջակցելու մորը»:
Չնայած առարկություններին՝ Պիեռոնը շարունակել է պնդել իրենը.
«Քո երեխան միշտ կողքիդ կլինի։ Դու 20 ժամ կծախսես ճանապարհի վրա, ամբողջությամբ դուրս կմնաս աշխարհի առաջնության ռիթմից։ Էմոցիոնալ առումով հյուծված կլինես, իսկ ԱԱ-ն չի կարելի բաց թողնել: Խոսենք տոմսերի գների մասին. կան երկրպագուներ, որոնք միգուցե վարկ են վերցրել, զոհաբերել են ամեն ինչ քո խաղին ներկա գտնվելու համար։ Իսկ դու չես մասնակցում խաղին զուտ պորտալարը կտրելու համա՞ր»:
Ասլումը կրկին փորձել է պաշտպանել ֆուտբոլիստին՝ ընդգծելով. «Աշխարհի առաջնությունը կարելի է հաղթել կամ տապալել։ Այն ավարտվեց՝ անցավ գնաց: Բայց երեխան քեզ հետ է ողջ կյանքում»:
«Բայց նա միշտ քեզ հետ կլինի, չէ՞ որ նա քեզ վրա չի բարկանա պորտալարը չկտրելու համար», — եզրափակել է լրագրողը:
Բանավեճի վերջում Պիեռոնը խոստովանել է, որ տաղավարում մնացել է փոքրամասնության մեջ՝ կատակելով. «Ես մենակ եմ ամբողջ աշխարհի դեմ»:
2024 թվականին Ֆրանս Պիեռոնն արդեն հայտնվել էր նմանատիպ սկանդալի կենտրոնում։ Այն ժամանակ նա հայտարարել էր, թե չի հասկանում այն մարզիկներին, ովքեր Փարիզի Օլիմպիական խաղերի ժամանակ պահանջում էին հատուկ պայմաններ և զիջումներ՝ իրենց երեխաներին խնամելու նպատակով:
