Լեհաստանի ազգային հավաքականի 37-ամյա հարձակվող Ռոբերտ Լևանդովսկին համաձայնության է եկել թուրքական «Ֆեներբախչեի» հետ՝ անձնական պայմանագրի կետերի շուրջ։
Ինչպես հաղորդում է լրագրող Յագիզ Սաբունջուօղլուն, ստամբուլյան ակումբի նախագահի թեկնածու Հաքան Սաֆին սկզբունքային համաձայնության է հասել լեհ ֆուտբոլիստի հետ՝ «դեղձանիկների» կազմում նրա ապագայի վերաբերյալ։ Սպասվում է, որ Լևանդովսկին կստորագրի «2+1» ձևաչափով աշխատանքային պայմանագիր։ Ըստ դրա՝ նրա տարեկան աշխատավարձը կկազմի 15 միլիոն եվրո, իսկ անհատական բարձր ցուցանիշների համար կնախատեսվեն նաև հավելյալ բոնուսներ։
Ավելի վաղ հայտնի էր դարձել, որ աստղային հարձակվողը չի կարողացել ընդհանուր հայտարարի գալ «Բարսելոնայի» հետ պայմանագրի երկարաձգման շուրջ, ուստի կատալոնական ակումբից կհեռանա ազատ գործակալի կարգավիճակով։
Հավելենք, որ նախորդ մրցաշրջանում լեհ ֆուտբոլիստը «կապտանռնագույնների» կազմում բոլոր մրցաշարերում մասնակցել է 46 հանդիպման՝ աչքի ընկնելով 19 խփված գնդակով և 4 արդյունավետ փոխանցմամբ։
