«Բարսելոնայի» գլխավոր մարզիչ Հանս-Դիտեր Ֆլիկը կիսվել է հույզերով Իսպանիայի Լա Լիգայի 35-րդ տուրում Մադրիդի «Ռեալի» նկատմամբ 2:0 հաշվով տարած հաղթանակից և ժամանակից շուտ երկրի չեմպիոն հռչակվելուց հետո։ Գերմանացի մասնագետը խոսել է թիմի միասնականության, անձնական ծանր կորստի և մնացած տուրերի նպատակների մասին:
Մարզիչն անկեղծացել է, որ հանդիպման օրն առավոտյան իմացել է հոր մահվան մասին, սակայն որոշել է կիսվել թիմի հետ.
«Առավոտյան, երբ մայրս զանգահարեց և հայտնեց հորս մահվան բոթը, մտածում էի՝ գուցե ավելի լավ է ոչինչ չասեմ թիմին: Բայց ի վերջո, նրանք ընտանիքի պես են, ես որոշեցի կիսվել, և երբեք չեմ մոռանա նրանց արձագանքը։ Հպարտ եմ այս թիմով ու մեր միջև ստեղծված կապով. բոլորն իրենց այս նախագծի մի մասնիկն են զգում: Այսօր դժվար է խոսել, բայց ես շատ երջանիկ եմ: Երբեք նման ջերմություն չեմ զգացել՝ սկսած նախագահի ու Դեկուի հետ առաջին շփումից և Բարսելոնա ժամանելուց»,- նշել է Ֆլիկը։
Խոսելով «Ռեալի» դեմ տարած տպավորիչ հաղթանակի մասին՝ Ֆլիկը շնորհակալություն է հայտնել ակումբի ղեկավարությանն ու երկրպագուներին.
«Երբեք չեմ մոռանա այս պահը։ Աննկարագրելի հույզեր են՝ երկրպագուների հետ միասին «Էլ Կլասիկոյում» հաղթել «Ռեալին»։ Մենք շատ լավ խաղացինք, հիանալի պաշտպանվեցինք և երկու գեղեցիկ գոլ խփեցինք: Շնորհակալ եմ ղեկավարությանը և տղաներին՝ յուրաքանչյուր խաղում պայքարելու պատրաստակամության համար: Կարծում եմ՝ ժամանակն է տոնելու։ Visca Barca! Visca Cataluña! (Կեցցե՛ Բարսան, կեցցե՛ Կատալոնիան)»։
Անդրադառնալով կազմի ընտրությանը և մրցաշրջանի դժվարություններին՝ մարզիչն ընդգծել է խաղացողների մտածելակերպի կարևորությունը.
«Մարզիչ լինելը երբեք հեշտ չէ, քանի որ բոլորն են ուզում խաղալ: Բայց ամեն ինչ կախված է մարզումների ժամանակ ցուցաբերած վերաբերմունքից: Մենք շատ վնասվածքներ ունեցանք, և ես կարծում էի, որ երկրորդ տարին ավելի բարդ կլինի, սակայն մենք ֆանտաստիկ մակարդակի վրա էինք։ Գուցե այնքան շատ գոլեր չխփեցինք, բայց սկսեցինք ավելի լավ պաշտպանվել հատկապես մրցաշրջանի վերջում: Անհավանական է տեսնել այսքան երիտասարդ խաղացողների առաջընթացը: Առջևում դեռ երեք խաղ կա, և մեր նպատակը 100 միավոր վաստակելն է»:
Հիշեցնենք, որ այս հաղթանակից հետո «Բարսելոնան» 91 միավորով անհասանելի դարձավ 2-րդ տեղում ընթացող Մադրիդի «Ռեալի» (77 միավոր) համար և ժամանակից շուտ նվաճեց Լա Լիգայի չեմպիոնի տիտղոսը:
