«Բարսելոնան» կիրակի օրը կայանալիք Էլ Կլասիկոյին մոտենում է այն հստակ գիտակցմամբ, որ հաղթանակը վերջնականապես կապահովի Լա Լիգայի չեմպիոնի տիտղոսը։ Նախախաղային մամուլի ասուլիսի ժամանակ կատալոնական թիմի գլխավոր մարզիչ Հանսի Ֆլիկը գովեստի խոսքեր է հնչեցրել մրցաշրջանի ընթացքում կատարված աշխատանքի վերաբերյալ և ընդգծել նման մասշտաբի խաղում թիմի ինքնությանը հավատարիմ մնալու կարևորությունը։
«Միակ բանը, որի վրա պետք է կենտրոնանանք, մեր սեփական ելույթն է»,- նշել է Ֆլիկը՝ գերադասելով շատ չխոսել Մադրիդի «Ռեալի» մասին։ «Որպես թիմ՝ մենք ֆանտաստիկ մրցաշրջան ենք անցկացրել։ Ուզում ենք ցուցադրել մեր խաղը, մեր ոճով ու որպես մեկ միասնական կոլեկտիվ»։
Այնուամենայնիվ, գերմանացի մասնագետն առանձնացրել է Կիլիան Մբապեին՝ որպես մրցակցի կազմում գլխավոր սպառնալիք. «Նա աշխարհի լավագույն ֆուտբոլիստներից մեկն է։ Ցանկացած իրավիճակում նա կարող է շատ վտանգավոր լինել»։
Խոսելով այն մասին, թե ինչ է նշանակում այս հանդիպումը բոլորի համար՝ Ֆլիկն ասել է. «Սա շատ կարևոր է երկրպագուների, ֆուտբոլիստների, ինչպես նաև մեզ՝ մարզչական շտաբի համար։ Մենք ցանկանում ենք նվաճել տիտղոսը՝ երկրորդ տարին անընդմեջ։ Ուրիշ ոչինչ նշանակություն չունի, մենք ամբողջովին կենտրոնացած ենք այդ նպատակի վրա։
Երբ դիտում եք մեր տնային հանդիպումները, անզեն աչքով նկատելի է թիմի և երկրպագուների միջև առկա կապը։ Դա չափազանց կարևոր գործոն կլինի վաղը»,- հավելել է նա։
Անդրադառնալով ակադեմիայի դերին՝ մարզիչն ընդգծել է. «Լա Մասիայի սաների աշխատանքը՝ իրենց յուրահատուկ փիլիսոփայությամբ ու մտածելակերպով, ահռելի չափով օգնում է թիմին։ Ամբողջ կազմը կարևոր է, և յուրաքանչյուրն իր առավելագույնը կտա խաղադաշտում։
Մենք պարզապես ուզում ենք հաղթել տանը: Էլ Կլասիկոն հսկայական նշանակություն ունի բոլորի համար՝ և՛ Մադրիդի, և՛ Բարսելոնայի։ Ահա թե ինչու ենք մենք այսքան մոտիվացված»։
Եզրափակելով խոսքը՝ Ֆլիկը ևս մեկ անգամ շեշտել է կայունության և թիմի ձեռագիրը պահպանելու անհրաժեշտությունը. «Մենք մեծ վստահություն ունենք մեր ուժերի նկատմամբ, և դա հենց այն է, ինչ ես ցանկանում եմ տեսնել վաղը։ Մենք չպետք է շեղվենք այն ուղուց և փոխենք այն ամենը, ինչ արել ենք այս մրցաշրջանում։ Պետք է դուրս գանք խաղադաշտ և խաղանք նույն կերպ»։
