Հայաստանի ֆուտբոլի ֆեդերացիան դիմել է ՈւԵՖԱ-ին՝ ի պատասխան Ուկրաինայի ֆուտբոլի ֆեդերացիայի գրությանը ֆուտզալի ԵՎՐՈ-2026-ի B խմբի առաջին տուրի Հայաստան-Ուկրաինա (2-1) հանդիպման ընթացքում գրանցված սկանդալային միջադեպի վերաբերյալ։
«Ի պատասխան Ուկրաինայի ֆուտբոլի ֆեդերացիայի գրությանը՝ Հայաստանի ֆուտբոլի ֆեդերացիան դիմել է ՈւԵՖԱ-ին՝ ներկայացնելով Հայաստան-Ուկրաինա հանդիպումից առաջ և ընթացքում տեղի ունեցած իրադարձությունները։ ՀՖՖ-ն ներկայացրել է դիտարկումներ, ըստ որոնց՝ ուկրաինական կողմի բողոքի պնդումներն անհիմն են։ Մանրամասները կներկայացնենք ավելի ուշ», — նշված է ՀՖՖ-ի տարածած հաղորդագրությունում։
Հիշեցնենք, որ Ուկրաինայի ֆուտբոլի ասոցիացիան պաշտոնապես դիմել է ՈւԵՖԱ-ի Վերահսկիչ, էթիկայի և կարգապահական մարմնին՝ կապված ֆուտզալի Եվրո-2026-ի որակավորման փուլի Հայաստան-Ուկրաինա հանդիպումից հետո տեղի ունեցած միջադեպի հետ։
Ուկրաինական կողմի դժգոհության պատճառը Հայաստանի հավաքականի և ռուսական «Տյումենի» ֆուտզալիստ Դենիս Նևեդրովի էմոցիոնալ արձագանքն է եղել եզրափակիչ սուլիչից հետո, ինչպես նաև նրա կատարած գրառումը Instagram-ում (էմոջին)։
Ինչպես ավելի վաղ հայտնել էինք Armsport.am-ի տեղեկություններով, իրավիճակը շատ ավելի խորքային է, իսկ լարվածությունը դեռևս հանդիպման մեկնարկից առաջ առաջացրել է հենց ուկրաինական կողմը։ Թեև ֆուտզալում ընդունված կարգ է մարզիչների և խաղացողների նախախաղային ձեռքսեղմումը, ուկրաինական կողմը հրաժարվել է սեղմել այն ֆուտզալիստների ձեռքը, որոնք հանդես են գալիս Ռուսաստանի առաջնությունում։
