Մադրիդի «Ռեալի» հիմնական կազմը ուրբաթ օրը մասնակցել է Լա Լիգայի պատասխանատուների կողմից կազմակերպված ամենամյա սեմինարին, որի նպատակն է իրազեկել ֆուտբոլիստներին ազնվության և օրինականության կանոնների մասին։
Իսպանիայի Պրիմերայի և Սեգունդայի 42 ակումբների բոլոր պրոֆեսիոնալ ֆուտբոլիստների համար գործում են խիստ կանոններ, համաձայն որոնց՝ նրանց արգելվում է խաղադրույքներ կատարել իրենց առաջնությունում կամ ցանկացած այլ մրցաշարում, որին մասնակցում է իրենց ակումբը, անգամ եթե դա վերաբերում է այլ մարզաձևերի։ Արգելքը տարածվում է նաև ներքին տեղեկատվության օգտագործման կամ փոխանցման, ինչպես նաև երրորդ կողմից պարգևավճարներ ստանալու կամ տալու վրա։
Վալդեբեբասում կայացած հանդիպումից հետո AS պարբերականի հետ զրույցում ակումբի աղբյուրները նշել են, որ «Ռեալը» զրոյական հանդուրժողականություն է ցուցաբերում խաղադրույքների և պայմանավորված խաղերի նկատմամբ՝ անկախ դրանց քրեական հետևանքներից։
Լա Լիգայի ներկայացուցիչները հատուկ ուշադրություն են հրավիրել այն փաստի վրա, որ կանոնների խախտումը հանգեցնում է ոչ միայն մարզական, այլև քրեական պատասխանատվության։
Խախտողներին սպառնում է 6 ամսից մինչև 4 տարի ազատազրկում և որակազրկում՝ 1-ից 6 տարի ժամկետով, իսկ Ֆուտբոլի ֆեդերացիան կարող է կիրառել 3 հազարից մինչև 30 հազար եվրոյի չափով տուգանքներ, 2-ից 5 տարով լիցենզիայի կասեցում կամ ընդհուպ մինչև ցմահ որակազրկում։
Բացի արդյունքի վրա ուղղակի ազդեցությունից, խախտում են համարվում նաև թիմակցի վնասվածքի մասին տեղեկատվության արտահոսքը, որը կարող է ազդել խաղադրույքների գործակիցների վրա, երրորդ կողմերին գումար առաջարկելը, միտումնավոր դեղին կամ կարմիր քարտ ստանալը, ինչպես նաև խաղի ցանկացած այլ պարամետրի արհեստական փոփոխությունը։
Վերահսկողության համար Լա Լիգան օգտագործում է TYCHE ծրագրային ապահովումը, որը հետևում է բուքմեյքերական ընկերություններում կատարվող շարժերին և կասկածելի դեպքերում ահազանգում է։
Անոմալիաների հայտնաբերման պարագայում տեղեկատվությունը փոխանցվում է Իսպանիայի ազգային ոստիկանությանը, որի հետ լիգան համագործակցում է 2017 թվականից։ «Ռեալ Մադրիդը» ևս իր հերթին կիրառում է ներքին վերահսկողության մեխանիզմներ՝ հետևելով ինչպես ֆուտբոլային, այնպես էլ բասկետբոլային թիմերին՝ հիմնական կազմից մինչև ակադեմիա։
