«Մանչեսթեր Սիթիի» գլխավոր մարզիչ Պեպ Գվարդիոլան հերթական անգամ անդրադարձել է «Բարսելոնա» հնարավոր վերադարձի թեմային՝ այս անգամ ոչ միայն կրկնելով մարզչական նստարանին վերադառնալու անհնարինությունը, այլ նաև բացառելով ակումբի նախագահի պաշտոնը զբաղեցնելու հեռանկարը։
Երկուշաբթի օրը «El Món a Rac1»-ին տված հարցազրույցում կատալոնացի մասնագետը մեկնաբանել է այն թեման, որն ամենաշատն է հուզում «Բարսայի» երկրպագուներին։
Առաջին անգամ մեկնաբանելով ակումբի նախագահ դառնալու հնարավորությունը՝ Գվարդիոլան նշել է, որ ապագա ընտրություններում թեկնածուների բազմազանությունը ողջունելի է և խոսում է ակումբի մեծության մասին։
«Այս հարցում «Բարսան» եզակի է։ Դա աշխարհի ամենամեծ ու ամենահատուկ ակումբն է, որովհետև բոլորն ուզում են առաջադրվել», — նշել է նա։
Սակայն, անդրադառնալով իր անձնական հեռանկարին, նա կատակով, բայց վճռականորեն մերժել է գաղափարը. «Ես չեմ մերժում «Բարսան»։ Դու միշտ այնտեղից ես, որտեղից սկսել ես։ Բայց… փողկապով նախագահական օթյակո՞ւմ։ Ո՛չ, ինձ այդ դերում չեմ տեսնում»։
Ինչ վերաբերում է մարզչական նստարանին վերադառնալուն, ապա Պեպի դիրքորոշումը տարիների ընթացքում մնացել է անփոփոխ և հետևողական։ Նա բազմիցս մերժել է վերադարձի գաղափարը։
Գվարդիոլան ակումբի բացարձակ լեգենդն է, ով պատմություն է կերտել թե՛ որպես խաղացող, թե՛ որպես մարզիչ։ Նրա գլխավորությամբ թիմը 2008-2012 թվականներին նվաճեց 14 տիտղոս, այդ թվում՝ ֆուտբոլի պատմության մեջ առաջին «սեքստետը» (վեց տիտղոս մեկ մրցաշրջանում)։
