«Բարսելոնայի» գլխավոր մարզիչ Հանսի Ֆլիկը մեծ սպասումներով է պատրաստվում Չեմպիոնների լիգայի մեկնարկային խաղին՝ ընդդեմ «Նյուքասլի»։ Կատալոնական ակումբի ղեկին իր երկրորդ մրցաշրջանում Ֆլիկը «Սենթ Ջեյմս Փարքում» կայանալիք հանդիպումը համարում է լուրջ մարտահրավեր՝ հաշվի առնելով մրցակցի ուժն ու Պրեմիեր լիգայի լավագույն մթնոլորտներից մեկը:
«Ես երբեք այստեղ չեմ եղել, բայց գիտեմ, որ այստեղ ֆուտբոլի ամենահիասքանչ մթնոլորտներից մեկն է: Սպասում եմ հզոր մրցակցի՝ բարձրակարգ, ինտենսիվ և դինամիկ թիմի: Էդի Հաուն և նրա մարզչական շտաբը հիանալի աշխատանք են կատարել»,- մամուլի ասուլիսում ասել է Ֆլիկը՝ գովեստով խոսելով «Նյուքասլի» մարզիչ Էդի Հաուի ձեռքբերումների մասին:
Ֆլիկը խոսել է նաև թիմի պատրաստվածության մասին՝ հիշատակելով վերջին հաղթանակը Լա Լիգայում «Վալենսիայի» նկատմամբ:
«Մինչմրցաշրջանում բավարար արդյունք ունեցանք, մենք հաղթեցինք բոլոր խաղերում, սակայն Լա Լիգայի առաջին հանդիպումներում չունեինք մեր սովորական որակը: Կիրակի օրը մենք խաղացինք այնպես, ինչպես անցյալ մրցաշրջանում, ինչը շատ դրական նշան է»,- նշել է նա:
Ֆլիկը ընդգծել է, որ թիմը երիտասարդ է, բայց մեծ նպատակներ ունի, չնայած երեք խաղացողների բացակայությանը:
«Բոլորը ցանկանում են ապացուցել իրենց ուժը»,- ավելացրել է մարզիչը՝ խոսելով թիմի մոտիվացիայի մասին:
Խոսելով առանձին խաղացողների մասին՝ Ֆլիկը խուսափել է մանրամասն մեկնաբանություններից, բայց առանձնացրել է Ռաֆինյային:
«Նա մեր առանցքային խաղացողներից է: Նա սկսում է մեր պրեսինգը և ղեկավարում է թիմի դինամիկան»,- ասել է նա:
Ինչ վերաբերում է Մարկուս Ռեշֆորդին, ով վերադառնում է հայրենիք՝ խաղալու, Ֆլիկը նշել է.
«Հուսով եմ, որ նա Անգլիայում կցուցադրի նույն խաղը, ինչ ցույց տվեց կիրակի օրը»:
Անցած մրցաշրջանի Չեմպիոնների լիգայում «Ինտերից» կրած պարտության մասին հարցին նա պատասխանել է.
«Ես չեմ կենտրոնանում անցյալի սխալների վրա»,- ընդգծելով, որ իր ուշադրությունը սևեռված է առաջընթացի և ամեն օր ավելի լավը դառնալու վրա:
«Նյուքասլ» – «Բարսելոնա» հանդիպումը կկայանա սեպտեմբերի 18-ին, ժամը 23:00-ին «Սենթ Ջեյմս Փարք» մարզադաշտում:
