«Շերիֆի» և Հայաստանի հավաքականի ֆուտբոլիստ Արթուր Սերոբյանը լրագրողների հետ կիսվել է Մոլդովայի գավաթակիր դառնալու տպավորությունների և ազգային թիմում տիրող տրամադրությունների մասին:
«Առաջնությունում չկարողացանք հաջողության հասնել, այդ իսկ պատճառով կարևոր էր գավաթակիր դառնալը, որի շնորհիվ եվրագավաթային ուղեգիր էինք նվաճելու: Շատ հաճելի էր, որ տիտղոս նվաճեցինք,թեև տխուր էինք, որ չկարողացանք չեմպիոն դառնալ:
Մոլդովայի և Հայաստանի առաջնությունների խաղամակարդակների տարբերությո՞ւնը. կարծում եմ՝ բավականին նմանություներ կան, քանի որ Հայաստանում էլ են որոշ խաղեր բարդ ստացվում, հեշտ խաղեր չկան: Թիմեր կան, որ լավ խաղամակարդակ ունեն և սպասվածից ավելի լավ են հանդես գալիս»,- ասել է Արթուր Սերոբյանը:
Խոսելով ընտրական մրցաշարից առաջ ընկերական խաղերում հաջողության հասնելու կարևորության մասին՝ Արթուր Սերոբյանը նշել է՝ բոլոր տղաները պաստրատված են միացել հավաքականի ճամբարին. «Հավաքականում ընկերական և պաշտոնական խաղեր չկան: Պատրաստվելու ենք դրական արդյունքի հասնել: Այո, ունենք բացակա խաղացողներ, որոնք թիմի համար շատ կարևոր են, բայց կարծում եմ՝ մյուս տղաները ևս պատրաստ են: Հավաքական ենք հրավիրվում և ամեն ինչ փորձում անել ազգի համար: Վստահ եմ՝ բոլորս կանենք մեր առավելագույնը»:
Հայաստանի ազգային հավաքականը մայիսի 31-ից մարզական հավաք է անցկացնում ՀՖՖ Տեխնիկական կենտրոն/Ֆուտբոլի ակադեմիայում:
Հունիսի 5-ին հավաքականը կմեկնի Պրիշտինա՝ հունիսի 6-ին «Ֆադիլ Վոկրի» մարզադաշտում անցկացնելու առաջին ընկերական հանդիպումը Կոսովոյի ընտրանու դեմ: Հանդիպման մեկնարկը՝ ժամը 21:00-ին (Երևանի ժամանակով):
Հունիսի 7-ին ազգային հավաքականը կմեկնի Պոդգորիցա: Չեռնոգորիայի հավաքականի հետ հանդիպումը կկայանա Նիկշիչ քաղաքի «Քաղաքային» մարզադաշտում և կմեկնարկի Երևանի ժամանակով ժամը 22:00-ին:
