Այսօր՝ մարտի 22-ին Թբիլիսիում կայացավ Հայաստանի ազգային հավաքականի գլխավոր մարզիչ Ջոն վանտ Սխիպի նախախաղային մամուլի ասուլիսը, որի մասնակցեց նաև կիսապաշտպան Արթուր Սերոբյանը։
«Պարզապես ինքնանպատակ չէ խաղալ 4-3-3 կամ 5-3-2 մարտավարությամբ, պետք է հաշվի առնել մրցակցի ուժը: Վրաստանի հետ տնային խաղում խաղում էինք կիսապաշտպանով, որն անընդհատ ներս էր մտնում: Պետք է միշտ հաշվի առնել նաև մրցակցի ուժեղ և թույլ կողմերը, և դրան համապատասխան ընտրել նոր մարտավարություն:
Վրաստանի հետ խաղին մոտեցել էինք այն մոտեցմամբ, որ մրցակիցը շատ լավ թիմ ունի, բայց դուք էլ տեսաք, որ անհատական բազմաթիվ սխալներ եղան: Հետևանքներ ասվածը բարձրակոչ հայտարարություն է, պարզապես պետք է գտնել թիմային բալանսը և հնարավորինս լավ պատրաստվել առաջիկա խաղին:
Միայն դարպասապահների դիրքում չէ, որ պետք է նոր ֆուտբոլիստներ փնտրենք, այլև պետք է ապահովել առկա խաղացողների զարգացումը: Կարծում եմ՝ հունիսյան հավաքի ժամանակ կփորձենք ավելի շատ ֆուտբոլիստներ դիտարկել:
Ոչ միայն Նարեկին, այլև բոլոր խաղացողներին ենք ուշադիր հետևում հավաքի ընթացքում: Նարեկը շատ հետաքրքիր խաղացող է, կարող է խաղալ ինչպես աջից, այնպես էլ հարձակվողի հետևում: Նա ունի շատ հետաքրքիր որակներ, և, ինչպես արդեն նշեցի, առաջիկա խաղերի ընթացքում փորձելու ենք հնարավորինս շատ հնարավորություններ տալ մի շարք երիտասարդ ֆուտբոլիստների:
Դա աշխատանքի մի մասն է, ես դրա մասին շատ լավ տեղյակ եմ, քանի որ Հունաստանում նույնպես բախվել եմ նման իրավիճակի, երբ այնտեղ ևս անկյունաքարային էր համարվում արդյունքը: Ես տեսնում եմ, և երևի դուք էլ եք տեսնում, որ այս թիմին ժամանակ է հարկավոր առաջընթաց ապահովելու համար: Հետ նայելով Հունաստանի փորձին՝ կարող եմ ասել, որ եթե հիմա նայենք նրանց թիմին, այնտեղ հիմնականում խաղում են այն ֆուտբոլիստները, այն թիմը, որ մենք ենք կառուցել:
Վերջին երկու օրվա ընթացքում 25 զրույց եմ ունեցել ֆուտբոլիստների հետ: Ռանոսին ասել եմ, որ նա երիտասարդ է, լավ տարիքում է և կստանա իր շանսը: Վաղվա խաղում էլ նրա հետ կապված ծրագրեր կային, ցավոք, ֆուտբոլիստը չի ցանկացել լսել:
Զրույցների ընթացքում բնականաբար հետաքրքրվում եմ ամուսնացած և երեխաներ ունեցող ֆուտբոլիստների մասին, թե ովքեր ինչ խնդիրներ ունեն: Այդպիսի ճանաչողական գործընթացը ժամանակ է պահանջում»:
