«Ռեալի» նախկին գլխավոր մարզիչ Զինեդին Զիդանը բանակցություններ է վարում Ֆրանսիայի ֆուտբոլի ֆեդերացիայի (FFF) հետ՝ ազգային հավաքականի գլխավոր մարզչի պաշտոնը զբաղեցնելու վերաբերյալ, հայտնում է Mundo Deportivo-ն։
Ավելի վաղ Ֆրանսիայի հավաքականի գլխավոր մարզիչ Դիդյե Դեշամը հայտարարել էր, որ 2026 թվականի աշխարհի առաջնությունից հետո կլքի պաշտոնը։ Հետագայում հայտնի դարձավ, որ Զիդանը ներառված է ազգային թիմի գլխավոր մարզչի թեկնածուների ցանկում։
Աղբյուրի տվյալներով՝ Զիդանը պատրաստվում է պայմանագիր ստորագրել ֆեդերացիայի հետ, սակայն դրա ժամկետը դեռ որոշված չէ։ Նա նաև ցանկանում է գլխավորել Ֆրանսիայի հավաքականը և շարունակել ապրել Մադրիդում։
Զիդանը գլխավորել է «Ռեալը» 2016-2018 և 2019-2021 թվականներին։ Մադրիդյան ակումբի հետ նա երեք անգամ նվաճել է Չեմպիոնների լիգայի գավաթը, երկու անգամ՝ Իսպանիայի առաջնությունը, Սուպերգավաթը, Աշխարհի ակումբային առաջնությունն ու ՈւԵՖԱ-ի Սուպերգավաթը։
Ֆրանսիայի հավաքականը Դիդյե Դեշամի գլխավորությամբ դարձել է աշխարհի չեմպիոն 2018 թվականին։
