Լոնդոնի «Արսենալի» գլխավոր մարզիչ Միկել Արտետան մեկնաբանել է «Նյուքասլ Յունայթեդի» հետ Անգլիայի լիգայի գավաթի կիսաեզրափակչում անցկացրած պատասխան խաղն ու երկու հանդիպումների արդյունքում մրցաշարից դուրս մնալը:
«Զինագործները» ընդհանուր 0:4 հաշվով զիջեցին մրցակցին ու լքեցին պայքարը:
«Մենք շատ հույս ունեինք, հավատում էինք, որ կարող ենք հավասարեցնել դիմակայության հաշիվը (թիմերի միջև առաջին հանդիպումն ավարտվել էր «Նյուքասլի»՝ 2:0 հաշվով հաղթանակով):
Առաջին գրոհում խաղը սկսվեց գոլով, բայց չհաշվվեց։ Մենք երկու լավ հնարավորություն ունեինք, բայց չօգտագործեցինք դրանք, և խաղը փոխվեց: Մենք ֆիզիկապես հոգնած էինք, քանի որ շատ հանդիպումներ էինք անցկացրել։ Դժվար էր նաև էմոցիոնալ առումով։ Սա այն խաղերից չէր, որում մենք լիովին հավատում էինք, որ կարող ենք դրական արդյունքի հասնել։
Ստիպված ենք ընդունել դա: Մենք գիտեինք, որ առաջադրանքը դժվար է լինելու՝ հաշվի առնելով առաջին հանդիպման արդյունքը: Հիմա բավականին ցավալի է, բայց մենք պետք է նայենք ապագային»,- Արտետայի խոսքերն է մեջբերում Football.London-ը:
Այսպիսով, «Նյուքասլը» դարձավ Լիգայի գավաթի եզրափակչի առաջին մասնակիցը: Վճռորոշ խաղում կաչաղակները կհանդիպեն «Լիվերպուլ»-«Տոտենհեմ» դիմակայության հաղթողի հետ։ Առաջին խաղն ավարտվել է Սփըրսի՝ 1։0 հաշվով հաղթանակով:
