Հունվարի 21-ին հայկական ֆուտբոլի լեգենդ, Հայաստանի ազգային հավաքականի բոլոր ժամանակների լավագույն ռմբարկու, «Ինտերի» կիսապաշտպան Հենրիխ Մխիթարյանը նշում է ծննդյան 36-րդ տարեդարձը։
«Ինտերը» շնորհավորել է հայ ֆուտբոլիստին ծննդյան օրվա կապակցությամբ։
«Ծնունդդ շնորհավոր, Հենրիխ Մխիթարյան։ Այսօր հայ կիսապաշտպանը դառնում է 36 տարեկան։ «Ինտերում» Մխիթարյանը նշում է իր երրորդ ծննդյան տարեդարձը որպես թիմի ֆուտբոլիստ՝ 2022 թվականի ամառվանից։ Ներաձուրիի մարզաշապիկով նա նվաճեց երկրորդ աստղային սկուդետտոն, Իտալիայի գավաթը և երկու Իտալիայի Սուպերգավաթ՝ որպես թիմի գլխավոր հերոս: Այս մրցաշրջանում մեր 22 համարն ընդհանուր առմամբ անցկացրել է 25 հանդիպում՝ դառնալով մեկ գոլի հեղինակ։ Ակումբի և բոլոր երկրպագուների լավագույն մաղթանքները «Ինտերի» կիսապաշտպանին»,- գրել է ակումբի մամուլի ծառայությունը։
Հայկական ֆուտբոլի լեգենդար ներկայացուցիչներից մեկը Հայաստանի ազգային հավաքականի պատմության լավագույն ռմբարկուն է, առաջին հայ ֆուտբոլիստը, որը հաղթել է եվրագավաթում, ինչպես նաև մի շարք այլ անհատական մրցանակների դափնեկիր։ Հենրիխը «Փյունիկի» սան է, երևանյան ակումբից տեղափոխվել է Դոնեցկի «Մետալուրգ», այնուհետև «Շախտյոր»: «Հանքափորների» կազմում փայլուն ելույթներից հետո ավելի բարձր մակարդակում Մխիթարյանի աստղը փայլել է Դորտմունդի «Բորուսիայում»: Հաջորդ քայլը «Մանչեսթեր Յունայթեդն» էր, որտեղ Մխիթարյանը դարձավ Եվրոպա լիգայի հաղթող: Տեղափոխություն «Արսենալ», այնուհետև «Ռոմա», իսկ այժմ նա հանդես է գալիս «Ինտերի» կազմում, որի հետ հասել է Չեմպիոնների լիգայի եզրափակիչ ու դարձել Ա Սերիայի չեմպիոն։
