Մայք Թայսոնի վերադարձը ռինգ ավարտվեց պարտությամբ։ Այսօր՝ նոյեմբերի 16-ին, բլոգեր Ջեյք Փոլը Տեխասում մրցավարների միաձայն որոշմամբ վստահ հաղթանակ տարավ լեգենդար ծանրքաշայինի նկատմամբ։
58-ամյա Թայսոնն Արլինգտոնի AT&T մարզադաշտում հազիվ թե կարողացավ հարված հասցնել 8 ռաունդանոց մենամարտի ընթացքում։ Փոլը հաղթեց մեծ առավելությամբ՝ 80-72, 79-73 և 79-73։
Մենամարտից հետո Ջեյք Փոլը խոստովանել է, որ որոշել է նոկաուտի չենթարկել Մայք Թայսոնին՝ երկրպագուներին էլ ավելի մեծ ու երկար հաճույք պատճառելու համար։
Այն հարցին, թե արդյոք նա նվազեցրել է տեմպը՝ նկատելով Թայսոնի հոգնածությունը, Փոլը պատասխանել է․ «Այո, անկասկած։ Ես ցանկանում էի երկրպագուներին շոու պարգևել, բայց չէի ցանկանում ցավ պատճառել նրան, ով դրա կարիքը չուներ»։
Մայք Թայսոնը ակնարկել է, որ նա դեռ պատրաստ է վերադառնալ ռինգ ապագայում, նույնիսկ անձամբ մենամարտի է հրավիրել Փոլի ավագ եղբորը՝ Լոգանին։
Այն հարցին, թե ում հետ կարող էր հանդիպել հաջորդիվ, «երկաթե» Մայքը պատասխանել է. «Չգիտեմ, գուցե նրա եղբոր հետ…»
Թայսոնը նաև պատմել է, թե ինչու էր մենամարտի ընթացքում մշտապես կծում իր ձեռնոցները։
«Ես սովորություն ունեմ մենամարտի ժամանակ կծել ձեռնոցները։ Ես կծելու ֆիքսացիա ունեմ», — պատասխանել է Թայսոնը։
Մայք Թայսոնի և Ջեյք Փոլի միջև մենամարտն անցկացվեց ոչ ստանդարտ բռնցքամարտի կանոններով։ Բռնցքամարտիկները անցկացրեցին ութ ռաունդ՝ յուրաքանչյուրը երկու րոպե տևողությամբ։ Մենամարտն ուներ պաշտոնական կարգավիճակ և կմտնի երկու մարզիկների պրոֆեսիոնալ հաշվարկի մեջ։
Ջեյք Փոլի և Մայք Թայսոնի մենամարտը դարձավ 2024 թվականի ամենասպասված բռնցքամարտային իրադարձություններից մեկը։ Երկու բռնցքամարտիկներն էլ կարողացան կլորիկ գումար վաստակել այս մենամարտից։
Մայք Թայսոնի բռնցքամարտային մենամարտերը միշտ մեծ ուշադրություն են գրավել, և այսօրվա մենամարտը բացառություն չդարձավ։ Թեև մրցանակային գումարի պաշտոնական չափը չի հրապարակվում, 58-ամյա մարզիկը վաստակել է մոտ 20 միլիոն դոլար այս մենամարտի համար։
Մյուս կողմից, սոցիալական ցանցերի աստղ Ջեյք Փոլը ակնարկել է, որ մենամարտի համար նա վաստակել է կրկնակի ավելին, քան Թայսոնը։
«Ես այստեղ եմ, որպեսզի վաստակեմ 40 միլիոն դոլար և նոկաուտի ենթարկեմ լեգենդին», — ասել է Փոլը մենամարտի առաջխաղացման մամուլի ասուլիսի ժամանակ։
