Մյունխենի «Բավարիայի», Մադրիդի «Ռեալի» և Գերմանիայի հավաքականի նախկին կիսապաշտպան Տոնի Կրոսը հրաժեշտի նամակ է գրել իր ֆուտբոլային կարիերայի ավարտի կապակցությամբ։
«Ահա այսպես։ Բայց նախքան դադար վերցնելը, ես կցանկանայի փորձել հասկանալ, թե ինչ է տեղի ունեցել վերջին 17 տարիների ընթացքում:
Ես չեմ ուզում բաց թողնել հնարավորությունը՝ շնորհակալություն հայտնելու բոլորին, ովքեր ընդունեցին ինձ այնպիսին, ինչպիսին կամ: Շնորհակալ եմ իմ բոլոր երկրպագուներին ամբողջ աշխարհում ձեր անվերապահ աջակցության համար։
Շնորհակալ եմ իմ բոլոր ակումբներին և մարզիչներին՝ ինձ հավատալու համար։ Շնորհակալ եմ թիմակիցներիս՝ ինձ գնահատված զգալու համար: Շնորհակալ եմ ընկերներիս, որ միշտ ազնիվ են եղել ինձ հետ, որքան էլ հաջողակ լինեմ: Շնորհակալություն իմ գործակալներին, ովքեր ընկերներ են դարձել»,- գրել է ֆուտբոլիստը:
Գերմանիայի հավաքականի կիսապաշտպան Տոնի Կրոսը մայիսին հայտարարել էր, որ 2024 թվականի Եվրոպայի առաջնությունից հետո կավարտի կարիերան։
Իր կարիերայի ընթացքում 34-ամյա կիսապաշտպանն ընդհանուր առմամբ անցկացրել է 919 հանդիպում և նվաճել 35 տիտղոս, այդ թվում՝ Չեմպիոնների լիգայի վեց տիտղոս։ Կրոսն իր պրոֆեսիոնալ կարիերայի առաջին 7 տարիներն անցկացրել է «Բավարիայում»: Տասը տարի առաջ նա տեղափոխվել է Մադրիդի «Ռեալ»։ Իր կարիերայի ընթացքում Կրոսը վեց անգամ հաղթել է ՈՒԵՖԱ-ի Չեմպիոնների լիգան, երեք անգամ՝ Գերմանիայի առաջնությունը և չորս անգամ՝ Իսպանիայի առաջնությունը։ Տասը տարի առաջ Կրոսը Գերմանիայի հավաքականի կազմում նաև դարձավ ֆուտբոլի աշխարհի չեմպիոն։
