Հայկական մարզաշխարհը կորոնավիրուսի մասին

Այս օրերին ամբողջ աշխարհը պայքարում է կորոնավիրուսի համաճարակի դեմ: Նոր կորոնավիրուսը կաթվածահար է արել նաև ամբողջ մարզաշխարհը: Այս օրերին նախատեսված մարզական բոլոր խոշոր միջոցառումները չեղարկվում կամ հետաձգվում են: Մարտի 17-ին հայտնի դարձավ նաև, որ մեկ տարով հետաձգվեց Ֆուտբոլի Եվրոպայի առաջնությունը:

Իրավիճակի հետ պայմանավորված ArmSport-ը կարճ զրույցներ է ունեցել հայկական մարզաշխարհի մի քանի ներկայացուցիչների հետ:

Արսեն Ջուլֆալակյան — Հունահռոմեական ոճի ըմբշամարտի աշխարհի ու Եվրոպայի չեմպիոն, Օլիմպիական խաղերի արծաթե մեդալակիր, ԱԺ պատգամավոր

-Հարգելի քաղաքացիներ, ելնելով մեր երկրում և ամբողջ աշխարհում ստեղծված իրավիճակից, կոչ եմ անում չմատնվել խուճապի, հետևել առողջապահության նախարարության ցուցումներին և հորդորներին, օգտվել միայն պաշտոնական լրահոսից: Անչափ կարևոր է լուրջ վերաբերվել այս համաճարակին և հասկանալ, որ յուրաքանչյուրիս պահվածքն ու վարքագիծը կարևոր է: Հոգ տանենք մեր հարազատների մասին, ավելի շատ ժամանակ անցկացնենք մեր ընտանիքների հետ, զբաղվենք ընթերցանությամբ, ինքնակրթմամբ, ֆիլմեր դիտելով և այլ հետաքրքիր ընտանեկան զբաղմունքներով: Միասին ավելի հեշտ կլինի հաղթահարել այս դժվարությունը:

Արամ Ավագյան — պրոֆեսիոնալ բռնցքամարտիկ

-Այս օրերին սպորտը մղվել է հետին պլան: Աշխարհում ամենակարևորը մարդկանց առողջությունն է: Բոլորին խորհուրդ կտամ մաքսիմալ հետևել հիգիենայի կանոններին և խուճապի չմատնվել: Հայրենակիցներիս ցանկանում եմ ասել, որ չկորցնեն հավատը: Ամեն ինչ լավ է լինելու:

Արթուր Դավթյան — Մարմնամարզության Եվրոպայի փոխչեմպիոն

-Մի փոքր դժվար է միշտ մնալ տանը, բայց հիմա կարևորը դա է : Շատ մրցումներ ունենիք, որոնք հետաձգվել են: Կորոնավիրուսը խառնեց ամբողջ աշխարհը, մենք էլ չենք մարզվում: Այս ամենը շատ վատ է: Փորձում եմ տնային պայմաններում պահել մարզավիճակս, բայց մեր մարզաձևում դա անելը տնային պայմաններում դժվար է:

Նազիկ Ավդալյան — Ծանրամարտի աշխարհի ու Եվրոպայի չեմպիոն

-Ամենակարևորը պետք է խուճապի չմատնվել և զգույշ լինել՝ հետևելով հիգիենայի կանոններին: Ինքս էլ փորձում եմ արդյունավետ օգտագործել տանը եղած ժամանակը:

Սիմոն Մարտիրոսյան — Ծանրամարտի աշխարհի և Եվրոպայի կրկնակի չեմպիոն, Օլիմպիական չեմպիոն

-Այս պահին ամենակարևորը մարդկանց առողջությունն է: Բոլորին խորհուրդ կտամ զգույշ լինել: Այս ամենը շուտով կանցնի և ամեն ինչ իր հունով կընթանա: Չնայած այս ամենի՝ ես շարունակում եմ մարզումներս՝ նախապատրաստվելով Եվրոպայի առաջնությանը:

Տիգրան Կիրակոսյան — Սամբոյի աշխարհի ու Եվրոպայի չեմպիոն

-Խորհուրդ կտամ բոլորին հնարավորինս չափ զգուշավոր լինել և խուսափել շփումներից: Ես ինքս էլ առիթից օգտվելով այս ընթացքում հանգստանում եմ, քանի որ առաջիկայում մրցումներ չունեմ:

Երվանդ Հակոբյան