Առաջին խմբում քաոս է, ով ինչ ուզում՝ անում է. Կարեն Հարությունյան

Հայկական ֆուտբոլում մրցաշարային դադարի հետ մեկտեղ դադար են վերցրել նաև հարաբերություններ պարզող կողմերը։ «Երևան» ակումբի դեմ նախկին սեփականատեր Կարեն Հարությունյանի հայցի քննումը դատարանում, որ պիտի կայանար մարտի վերջին, հետաձգվել է։ Նախկին ակումբի հետ հարաբերությունների պարզումը դադարի մեջ է, բայց Կարեն Հարությունյանի առաջնային պլանների օրակարգից դուրս չի եկել։

Այն, որ «Երևան» ակումբի դեմ Կարեն Հարությունյանի հայցը դատարանն ընդունել է վարույթ, ArmSport-ը դրան անդրադարձել էր դեռևս հունվարին։

«Երևան» ակումբի շուրջ ծավալված իրադարձությունների պատկերն, իհարկե, տխուր է, բայց նախկին ակումբը դատարանի միջոցով վերադարձնելու հարցն առաջ չէր գա, եթե նոր սեփականտարերերը լիարժեք կատարած լինեին պայմանագրով նախատեսված ֆինանսական պարտավորությունները։

«Մենք պայմանագիր ունենք ստորագրած ակումբի նոր սեփականատերերի կողմից լիազորված անձի հետ, որին նվիրատվություն եմ արել ակումբի 100% մասնաբաժինը: Դրա դիմաց նրանք 3 ամսվա ընթացքում պետք է հետ վերադարձնեին այն գումարը, որը ներդրել եմ ակումբում: Նրանք խախտել են պայմանավորվածության բոլոր կետերը: Զբաղվում են միայն խարդախությամբ։ Ես նոր սեփականատերերին տեսել եմ մի քանի րոպե: Ամբողջ գործարքը եղել է իրենց կողմից լիազորված հայ մարդու հետ: Բարձրագույն խմբի լիցենզիա ստանալուց հետո մենք չցանկացանք մնալ ֆուտբոլում, քանի որ չէինք ցանկանում աշխատել ֆեդերացիայի ղեկավար կազմի հետ (խմբ.-ֆեդերացիայի նախագահը Արթուր Վանեցյանն էր): Մենք շատ ժամանակ էլ չունեինք, այդ պատճառով հապճեպ որոշում կայացրեցինք, երևի դրանում իմ մեղքի բաժինն էլ կա»,- ArmSport—ի հետ զրույցում մանրամասներ է վերհիշում Կարեն Հարությունյանը։

Ակումբի նախկին սեփականտերը մեծ է համարում հավանականությունը, որ դատը կշահեն։ Կարեն Հարությունյանի խոսքով, ակումբի նոր սեփականատերերը հետաքրքրված չեն ֆուտբոլի զարգացմամբ և այլ նպատակներ են հետապնդում. «Ակնհայտ է, որ նոր տերերը մութ գործերի մեջ են»:

Չնայած ֆինանսական դժվարություններին և մրցաշարային 0 արդյունքին՝ տեղեկություններ կան, որ «Երևան» ակումբը պատրաստվում է հայտ ներկայացնել՝ մասնակցելու Առաջին խմբի գալիք առաջնությանը:

Այս մասին ոչ պաշտոնական աղբյուրներից իր ստացած տեղեկություններն է ArmSport-ին փոխանցում Կարեն Հարությունյանը․ «Ես հայտարարում եմ ևս մեկ անգամ՝ այն մարդիկ, որոնք կապված են այդ ակումբի հետ, զբաղված են այլ գործունեությամբ և ոչ թե ֆուտբոլի զարգացմամբ: Առաջին խմբի նպատակն այն է, որ թիմը Բարձրագույն խումբ դուրս գա, առաջ գնա: Եթե մի ակումբ մտածում է, որ քիչ բյուջեով պետք է հանդես գա միայն Առաջին խմբում, արդեն պարզ է, որ ուրիշ նպատակներ է հետապնդում այդ ակումբի գործունեությունը։ Զարմանալին այն է, որ կարող են այլ ակումբ հիմնադրել: Ինչու՞ են կախվել հենց «Երևանից»՝ անհասկանալի է»:

Կարեն Հարությունյանը նշում է, որ ինքը շարունակելու է գործունեություն ծավալել հայկական ֆուտբոլում և ամեն ինչ անելու է, որպեսզի հետ վերադարձնի ակումբը. «Ես շատ լուրջ ծրագրեր ունեմ թիմի հետ: Ցանկանում եմ հետ վերադարձնել «Երևանը»: Շատ լուրջ մարդիկ կան, որոնք ցանկանում են ներդրումներ անել թիմում: Մենք հիմա ուզում ենք գլոբալ խնդիր լուծել՝ ստեղծել բազա իր մարզադաշտով, որը կունենա շուրջ 3 հազար նստատեղ: Արդեն մարդիկ կան, ովքեր հավանություն են տվել այդ ծրագրին: Մոտ ժամանակներս ամեն ինչ ավելի պարզ կլինի: Ակումբ ստեղծելը խնդիր չէ: Կարող ենք այլ ակումբ հինմնադրել, բայց այդ մարդկանց քայլերից ելնելով՝ նրանք իրավունք չունեն լինել հայկական ֆուտբոլում»:

Վերադառնալով հայկական ֆուտբոլի ցավոտ խնդիրներին՝ Կարեն Հարությունյանը նկատում է, որ Առաջին խմբում շատ թիմեր այլ նպատակներ են հետապնդում. «Չի կարելի ֆուտբոլին վերաբերվել նման կերպ: Պետք է այնպիսի մեխանիզմ մշակել, որ Առաջին խմբում նման մարդիկ չհայտնվեն: Այսօր Առաջին խմբում չկա լեգիոներների սահմանափակում, ով հասցնում է՝ իրենց մարզիչներով ու ֆուտբոլիստներով գալիս են ու ինչ ուզում՝ անում եմ: Այդ խնդրին կարելի է 5 րոպեում լուծում տալ: Առաջին խմբում քաոս է, ով ինչ ուզում անում է»:

Հարցին, թե ով է այդ ամենի մեղավորը, Հարությունյանը պատասխանում է. «Առաջին հերթին մեղավոր է ֆեդերացիան: Այսօր հայկական ֆուտբոլը մեծ «իմիջ» ունի՝ շատ մարդիկ ձգտում են Առաջին խմբում ակումբներ ունենալ: Ո՞րն է միտքը: Երբ «Երևանը» ԲԽ-ի ուղեգիր ստացավ, և ես ցանկություն չունեի մնալ ֆուտբոլում, մի շարք թիմերի առաջարկել եմ, որ ակումբը տանք իրենց: Եթե նրանք չեն ցանկացել մասնակցել ԲԽ-ին, ապա ի՞նչ նպատակ են հետանդում՝ միայն Առաջին խմբում հանդես գալով: Շատ խորանալ պետք չի հասկանալու համար, թե ինչ են ուզում: Կարող եք տեսնել, թե ովքեր են Առաջին խմբում: Այդ ի՞նչ նվիրյալներ են, որ այդքան գումարներ են ծախսում: Առաջին խմբի թիմերից կառանձնացնեմ մեկ-երկուսին, որոնք լուրջ նպատակներ ունեն։ Առաջնությունում հանդես գալու թույլտվություն տալու համար նախ պետք է հանդիպել սեփականտերերին, տեսնել, թե ո՞վ են այդ մարդիկ, ի՞նչ մութ գործերի մեջ են»:

Չնայած Հարությունյանը մեծ է համարում հավանականությունը, որ կշահեն դատը, այնուամենայնիվ, եթե չստացվի հետ վերադարձնել «Երևան» ակումբը, միևնույն է ֆուտբոլ վերադառնալու որոշումը վերջնական է․ կհիմնադրեն նոր ակումբ և կմասնակցեն Առաջին խմբի նոր առաջնությանը:

«Ֆեդերացիայի նոր ղեկավար կազմի հետ ոչ մի խնդիր չունեմ: Նախկինում էլ որևէ արտառոց բան չի եղել, ուղղակի չենք ցանկացել աշխատել: Սպասենք դատական նիստերին, եթե մենք չհաղթեցինք, ապա այլ ակումբ կհիմնադրենք և դրանով մեր մասնակցությունը կունենք Առաջին խմբին»,-եզրափակում է մեզ հետ զրույցը Կարեն Հարությունյանը:

Երվանդ Հակոբյան