«Երևան» ակումբը հայկական ֆուտբոլի «ամենամութ» կետերից մեկն է: Առաջին խմբում լավ մրցաշրջանից հետո ակումբը ստացավ Բարձրագույն խմբում հանդես գալու արտոնագիր, այնուհետև վաճառվեց հայկական ֆուտբոլին անհայտ անձանց, որից հետո սկսվեց իսկական քաոս:
Ինչպես հայտնի է, «Երևան» ակումբը հիմնադրել է «Փյունիկի» երկար տարիների գործադիր տնօրեն Կարեն Հարությունյանը, որն էլ հենց վաճառել է ակումբը:
ArmSport-ին հայտնի է դարձել, որ Կարեն Հարությունյանը ցանկանում է վերադարձնել ակումբը, ինչի համար դիմել է դատարան:
«Ակումբը վաճառելու պահին մենք քիչ ժամանակ ունեինք, ուստի հապճեպ որոշում կայացրինք: Ռուս և բելառուս անձինք հայ ներկայացուցչի միջոցով կապ են հաստատել մեզ հետ: Այնուհետև հանդիպել ենք, համաձայնության հասել և ես ստորագրել եմ ակումբի 100 % բաժնետոմսերը վաճառելու պայմանագիրը:
Ինչպես պարզվեց, գնորդները հիմար մարդիկ են, որոնց հետ կնքած պայմանագրով նախատեսված պարտավորությունները, նաև ֆինանսական, չեն կատարվել: Ըստ պայմանագրի՝ ակումբի ձեռքբերման դիմաց գումարը պետք է վճարվեր մաս-մաս՝ ընթացիկ ժամանակահատվածում, ինչը բացարձակ չի կատարվել: Ֆուտբոլից նույնիսկ 5 % հասկացող մարդիկ ընթացքում իմացան, թե ովքեր են նրանք և ինչ մութ գործերի մեջ են»,- մեզ հետ զրույցում ասաց Հարությունյանը:
Նա նաև անդրադարձավ նախապատմությանը. «Վաղարշապատի ֆուտբոլի ակադեմիան ՀՖՖ Գործկոմի որոշմամբ մեր ակումբին էր տրամադրվել, բայց այնուհետև տենդեր հայտարարվեց: «Փյունիկը» և «Ուրարտուն» հրաժարվել էին, սակայն որպես միակ դիմող՝ մենք չստացանք այն և ակադեմիան մնաց ՀՖՖ-ի բալանսին: Բազա չունենալը կրկնապատկում է ակումբի ծախսերը: Մենք ակումբը վաճառելուց առաջ դիմել ենք Առաջին խմբի ակումբներին. զարմանալի է, որ ոչ ոք չցանկացավ գնել՝ այն դեպքում, երբ Բարձրագույն խմբի արտոնագիր ունեինք:
Ինֆորմացիա ունեմ նաև, որ Վաղարշապատի ակադեմիայից ցանկանում են հանել մեր հիմնած մանկապատանեկան թիմերը, որոնցում մարզվում են շուրջ 200 երեխաներ: Հավելեմ նաև, որ ժամանակին մարզագույք էինք ձեռք բերել, որը մինչև այժմ ակադեմիայում է»:
Կարեն Հարությունյանը հաստատեց, որ դիմել է դատարան և մանրամասնեց. «Դիմել ենք դատարան, որը գործը վարույթ է ընդունել: Դատարանից նաև գրություն ենք ստացել, որ վարույթի շրջանակներում ակումբի գործունեությունը այս փուլում կասեցված է: Առաջիկա օրերին կիմանանք դատի օրը: Մնացած հարցերով կզբաղվեն մեր փաստաբանները»:
Ինչպես հայտնի է, «Երևանը» չի վճարել հայ ֆուտբոլիստների աշխատավարձերը: Կարեն Հարությունյանը դրվագ վերհիշեց նոր ղեկավարների գործունեությունից.
«Ակումբը վաճառելուց հետո փաստաթղթերով ես մնացել էի նախագահի պաշտոնում: Երբ իմացա, որ չեն վճարվում հայ տղաների աշխատավարձերը, միջամտեցի՝ դիմելով ՀՖՖ: Տեղյակ ենք, որ ՀՖՖ-ի և բեթինգային ընկերության համագործակցության շրջանակներում ԲԽ-ի մասնակից ակումբները տարեկան 5 միլիոն դրամ են ստանում: ՀՖՖ-ն այդ գումարով ֆուտբոլիստների աշխատավարձերը վճարելու իմ միջնորդությունը մերժեց: Ակումբի նոր ղեկավարները ինչ-որ կերպ իմացել են այդ մասին, իմ տեղեկություններով՝ ընդամենը մեկ օրում ժամանել Հայաստան և Պետռեգիստրում փոփոխություններ իրականացրել»,- հավելեց Հարությունյանը:
Բարձրագույն խմբի 15 տուրերից հետո «Երևանը» նույնքան պարտությունից հետո առանց միավորի եզրափակում է մրցաշարային աղյուսակը: Ակումբի առաջիկա գործունեությունը խիստ անորոշ է: Խոսելով հետագայի մասին՝ Հարությունյանն ասաց. «Հայաստանում մարտին վերսկսվում է մրցաշրջանը: Ակումբը վերադարձնելու դեպքում, ըստ ամենայնի, չենք կարող հասցնել նախապատրաստվել առաջնությանը»:
Արման Առաքելյան
