Եվրոպական ֆուտբոլի գիգանտների համար ամառային հանգիստը շարունակվում է։ Մինչև համեմատաբար միջին ու փոքր թիմերը միմյանց հոշոտում են եվրագավաթային տարբեր մրցաշարերի նախնական փուլերում, «մեծերը» մասնակցում են ընկերական մրցաշարերի, «շրջում են» տրանսֆերային շուկայում և փնտրում են «մեծ զեղչով լավ ապրանք»։ Այդ տեսանկյունից այս տարվա տրանսֆերային պատուհանից շատ ավելի լուրջ քամիներ են գալիս, քան նախորդից։ Նախ Սաուդյան Արաբիայում հասկացել են, որ կարելի է նավթամիլիոնները ներդնել ոչ թե արտասահմանյան ակումբներում, այլ ներսի ֆուտբոլում։ Եվրոպական թոփերն էլ ակտիվ են։ Ոմանք աջ ու ձախ գնումներ են անում (ՊՍԺ, «Արսենալ»), ոմանք տոնավաճառ են հայտարարել («Չելսի»)։ Այդ տեսանկյունից «Ինտերին» կարելի է դասել և՛ ծախսողների, և՛ վաճառողների շարքին։
Այս ընթացքում թիմի ճամբարն արդեն թողել են Դ՛Ամբրոզիոն, Հանդանովիչը, Բրոզովիչը, Օնանան ու Շկրինյարը, փոխարենը՝ եկել են Դավիդե Ֆրատեզին ու Մարկուս Թյուրամը։ Ենթադրվում էր, որ Լոնդոն — Միլան չվերթի մեծ սիրահար Ռոմելու Լուկակուն ևս մեկ մրցաշրջան կանցկացնի «Ինտերում», սակայն վերջին օրերի ընթացքում համացանցում հայտնվեցին ցնցող նորություններ այն մասին, որ բելգիացին մեկ ոտքով արդեն Թուրինում է։
Ի՞նչ ենք մենք բաց թողել
Նախ հիշեցնենք, որ Լուկակուն «Ինտերում» խաղում էր վարձավճարով և մրցաշրջանի ավարտից հետո պետք է վերադառնար «Չելսի», եթե թիմերի միջև նոր բանակցություններ չսկսվեին։ «BigRom»-ի ներկայացուցիչների և «Ինտերի» միջև երկխոսությունը շատ դանդաղ էր ընթանում։ Սկզբում միլանցիները չէին ցանկանում գնել նրա տրանսֆերը՝ նախընտրելով Ռոբերտո Ֆիրմինոյի հետ պայմանագիրը կնքել անվճար։ Սակայն Չեմպիոնների լիգայի եզրափակիչից առաջ Լուկակուն հիշեց իր լավագույն տարիները և 1,5 ամսում «գոլ+գոլային փոխանցում» համակարգով հավաքեց 12 միավոր և ստիպեց «Ինտերին» մտափոխվել։ Սիմոնե Ինձագին անձամբ է դիմել Բեպպե Մարոտային և Խավիեր Ձանետիին զբաղվել տրանսֆերի իրականացմամբ։ «Ինտերը» ցանկանում էր ևս մեկ տարի վարձակալել ու մրցաշրջանի վերջում իրականացնել վերջնական գնումը, «Չելսին» ցանկանում էր գումարը ստանալ հենց այդ պահին։
Մինչև «Ինտերն» ու «Չելսին» խելք խելքի էին տալիս՝ ինչպես հարմարվել տրանսֆերի կամ վարձակալության հարցում, Լուկակուին ձեռք բերելու ցանկությամբ հայտնվեցին փողին փող չասող սաուդները։ Տարեկան խելահեղ մոտ 60 միլիոն եվրո աշխատելու հնարավորությունից Լուկակուն հրաժարվեց անմիջապես ՝ պնդելով, որ ցանկանում է խաղալ բացառապես Եվրոպայում։ Ընդ որում, ըստ երևույթին, Լուկակուն այնքան հեռու է ուղարկել իրեն առաջարկ արած ներկայացուցիչներին, որ Սաուդյան Արաբիայի մյուս մեծահարուսները նույնիսկ չեն էլ ցանկացել կապի դուրս գալ նրա հետ։
Կարճ ժամանակ անց համացանցում սկսեցին պտտվել առաջին շշուկներն ակումբների միջև ձեռք բերված համաձայնության մասին. «Չելսին» «Ինտերից» Լուկակուի համար կստանա 35 միլիոն եվրո միանգամից՝ ևս 5 միլիոն էլ բոնուսների տեսքով։ Սակայն գրեթե անմիջապես հետո սկսվեց անհասկանալին. Լուկակուի գործերով զբաղվող անձնավորությունը՝ Սեբաստիան Լեդուրը, սկսեց չպատասխանել հեռախոսազանգերին։ Հետագայում պարզվեց, որ նման խնդրանքով հանդես է եկել հենց Լուկակուն, որը ցանկանում էր դիտարկել «Յուվենտուսի» առաջարկը։ Ի դեպ, բելգիացու ծառայությունները թուրինյան գրանդին առաջարկել է հենց Լեդուրը։ La Gazzetta dello Sport-ի տեղեկություններով՝ Լուկակուն, ի վերջո, դուրս եկավ կապի «Ինտերի» հետ, սակայն սկսեց իր երբեմնի սիրելի թիմի ներկայացուցիչների հետ խոսել բարձր տոնով։ Այդ հանգամանքը բավական էր, որ «Ինտերը» դուրս գա նրա համար մղվող պայքարից։
Իտալիայում արգելել են «88» համարի մարզաշապիկները. ինչու՞ և ի՞նչ կապ ունի դրա հետ Բուֆոնը
Երկրպագուները պարզապես ապշած են Լուկակուի ընտրությունից։ Տարիներ առաջ Լուկակուն երդվում-պատռվում էր, որ պաշտում է «Ինտերը»։ Բելգիացին չվախեցավ սեր խոստովանել «Ներաձուրիներին» «Չելսիում» խաղալու ժամանակահատվածում։ Sky Sports-ի հետ սկանդալային զրույցում բելգիացին հայտարարեց, որ փոշմանում է Միլանից հեռանալու համար։
«Ինձ մտահոգում է այն, թե ինչպես եմ հրաժեշտ տվել ակումբին ու երկրպագուներին։ Ես միշտ ասել եմ, որ մի օր վերադառնալու եմ։ Դա հայտարարում եմ հիմա, երբ խաղում եմ «Չելսիում»։ Ես ինձ վատ եմ զգում, որ ցավ եմ պատճառել երկրպագուներին, որոնք ինձ աջակցեցին ամենաբարդ պահին։ Նրանք ինձ անմնացորդ հավատացին, ու ես ցանկանում էի նույնպես նրանց նվիրվել ու լավ վերաբերմունքով պատասխանել, բայց ստացվեց հակառակը։ Ես պաշտում եմ Իտալիան, Միլանում տուն եմ գնել և ցանկանում էի այնտեղ տեղափոխվել ընտանիքիս հետ։ Ես սպասում էի, որ «Ինտերը» կգնի իմ տրանսֆերը, սակայն ինձ մերժեցին՝ պնդելով, որ ֆինանսապես դա հնարավոր չէ իրականացնել։ Ես մեծ ցավ ապրեցի ու վերադարձա «Չելսի» ու սպասեցի հաջորդ հնարավորությանս, քանի որ վստահ էի՝ վերադառնալու եմ։ Ոչ «Միլան» և «Յուվենտուս», միայն «Ինտերում» եմ ես խաղալու», — հայտարարել է Լուկակուն։
Նույն La Gazzetta dello Sport-ի տեղեկություններով, «Յուվենտուսը» լրջորեն հետաքրքրված է Լուկակուով։ Սակայն բելգիացին մեծ ռիսկի է գնում, քանի որ այս գործարքը կիրականանա միայն ու միայն այն դեպքում, եթե «Յուվենտուսին» հաջողվի ազատվել Դուշան Վլահովիչից, այլապես «Յուվենտուսի» գրպանը «ծակ է»։ Լրագրող Ալֆրեդո Պեդուլայի տեղեկություններով, սերբ հարձակվողին ցանկանում է ձեռք բերել ՊՍԺ-ն՝ անկախ այն հանգամանքից՝ կգնա Մբապեն Փարիզից, թե ոչ։ Footmercato-ն գրում է, որ Վլահովիչի հետ արդեն կա բանավոր համաձայնություն պայմանագրի հարցում. Վլահովիչը ՊՍԺ-ում պետք է վաստակի 11 մլն եվրո։ Սակայն թուրինցիները չեն ցանկանում բաժանվել հարձակվողից ցածր գնով. Փարիզից ուղարկել են 80 մլն եվրո արժողությամբ պայմանագիր, «Յուվեն» «8»-ի փոխարեն գրել է «9» և հետ ուղարկել Փարիզ։ Այնտեղ դեռևս մտածում են։
Նույնիսկ եթե Վլահովիչը հեռանա Թուրինից, Լուկակուի համար ոչինչ երաշխավորված չէ։ «Յուվեն» նայում է իր նախկինի՝ Ալվարո Մորատայի կողմը, որը նրանց վրա «կնստի» մոտավորապես 20 մլն եվրո։ Մեկ այլ տարբերակ է «Սևիլիայի» հարձակման գծի առաջատար Յուսեֆ Էն-Նեսերին, որը նույնպես ավելի մատչելի տարբերակ է, քան Ռոմելու Լուկակուն։ Այնպես որ, «Ինտերի» ներկայացուցիչների վրա հեռախոսով բղավելը դեռ կարող է շատ թանկ նստել բելգիացու վրա։
Ռոբերտ Գասպարյան
