The Main Event…Դուք հաստատ փշաքաղցվեցիք հենց նոր․․․Ո՞չ։ ՉԵՄՊԻՈՆՆԵՐԻ ԼԻԳԱՆ վերադարձել է։ Իսկ հիմա՞․․․
Բարի օր, բարի գալուստ։ Ակումբային ֆուտբոլի գլխավոր մրցաշարը այսօր երեկոյան կվերադառնա կանաչ տիրույթ։ Չեմպիոնների լիգայի հիմնը կարելի է միացնել ու լսել թե՛ հեռախոսով, թե՛ համակարգչով, բայց մարմնովդ ֆուտբոլային դողն անցնում է այն ժամանակ, երբ լեգենդար հիմնը լսում ես երկու թիմերի առճակատումից վայրկյաններ առաջ Եվրոպայի չքնաղ քաղաքներից մեկի նույնպիսի ստադիոնում։
Մեր առաքելությունը ոչ այլ ինչ է, քան քննարկելը այսօր կայանալիք երկու հանդիպումները։ Դրան դեռ կգանք, ուղղակի եկեք մի քանի բանալի բառերով հիշենք, թե ինչ տվեց նախորդ խաղարկության փլեյ-օֆֆ փուլը։ «Այաքս», Ռոնալդու-Սիմեոնե, «Ման․ Սիթի» — «Տոտենհեմ»՝ VAR, Լուկաս Մոուրա, “Corner taken quickly, Origi”, Լուկաս Մոուրա, Let’s talk about six, baby…
Դրական ու բացասական էմոցիաների ու հիշողությունների անվերջանալի տեղատարափ են առաջացնում այս բառերն ու անունները։ Նման մի բան մեզ հաստատ սպասվում է նաև այս տարի։ Իսկ հիմա պաթոսը թողնենք մի կողմ ու կենտրոնանանք երեկոյան կայանալիք հանդիպումների վրա։
«Աթլետիկո Մադրիդ» — «Լիվերպուլ»
Լիգայի գործող գավաթակիրը խմբում դժվարությամբ առաջին տեղը զբաղեցնելուց հետո մրցակից ստացավ մի թիմի, որը Չեմպիոնների լիգայի նախորդ վեց մրցաշրջաններից երկուսում խաղացել է եզրափակչում։ Հիմա կասեք․«Իբր բան ասեցիր։ «Լիվերպուլն» էլ վերջին երկու մրցաշրջաններում է խաղացել եզրափակչում ու նախորդ տարի, ի դեպ, հաղթել է»։ Այո՛, համաձայն եմ ձեզ հետ։ Այս տողերը ասում էի ոչ այնքան «Աթլետիկոյի» եզրափակիչներում խաղալու փաստը ընդգծելու, այլ գավաթային թիմ լինելու հանգամանքը ի ցույց դնելու համար։ Վերջին տարիներից հիշենք նաև 2016-2017 թվականը, երբ «ռոխիբլանկոսները» հասան մինչև կիսաեզրափակիչ։ Այս ամենը տանում է նրան, որ մադրիդցիների հետ Կլոպին ու իր խելահեղ տղաներին հեշտ չի լինելու, բայց․․․
«Չեմ կարծում, թե Սիմեոնեն ցատկոտում էր հյուրանոցի իր համարում, երբ իմացավ, որ մրցակից է ստացել «Լիվերպուլին»»,-ասաց Կլոպը վիճակահանությունից հետո։ Գերմանացի մասնագետը ուղղակի անբացատրելի թիմ է ստեղծել, որի մասին խոսելիս բառեր դժվարանում ես գտնել։ «Լիվերպուլը» ԱՊԼ-ում առաջ է իր մրցակիցներից 25 միավորով․ 25 ՄԻԱՎՈՐՈՎ, ԿԱ՜ՌԼ։ Ի՞նչ է սա, եթե ոչ խելագարություն։ Նույն Կլոպը օրեր առաջ հայտարարեց, որ ինքը այդքան խելացի չէ 25 միավորի առավելությունը հասկանալու համար։
Իսկ ի՞նչ մարզավիճակում է «Աթլետիկոն»։ Վա՛տ։ Շատ վա՛տ։ Դիեգո Սիմեոնեի թիմը Լա լիգայում 13 միավորով է հետ մնում առաջատար Մադրիդի «Ռեալից» ու կիսում է 4-5 տեղերը «Սևիլիայի» հետ։ «Աթլետիկոն» ընթացիկ մրցաշրջանում լուրջ խնդիրներ ունի հարձակման գծում։ Պրիմերայում 24 խաղ՝ ընդամենը 25 գոլ․ սա շատ վատ է։ Դիեգո Գոդինի հեռանալը որոշակի խնդիրներ է առաջ բերել նաև պաշտպանության կենտրոնում։
Իսկապես դժվար է պատկերացնել, թե ինչ կարող է առաջարկել «Աթլետիկոն» այս «Լիվերպուլին», որը, կարծես, անկասելի է թվում ամեն ինչում։ Կարևորագույն գործոն է առաջին խաղը Մադրիդում անցկացնելը։ Եթե «Վանդա Մետրոպոլիտանոյում» Սիմեոնեի թիմը մի ինչ-որ հրաշքով հասնի դրական արդյունքի, դա զարգացնելը «Էնֆիլդում» մեգաբարդ կլինի։
Կա ևս մեկ փաստ, որը գրեթե փոշիացնում է «Աթլետիկոյի» հնարավորությունները։ Անգամ «Վանդայում» «Լիվերպուլը» իրեն զգալու է, ինչպես տանը, չէ՞ որ հենց այստեղ նրանք բարձրացրին ակումբային չեմպիոնների վեցերորդ գավաթը։ Ինչպես ամիսներ առաջ ասել էր Կլոպը․«Այդ ստադիոնում իմ կյանքի լավագույն օրերից մեկն է անցել»։
Մադրիդցիները ունեն լրջագույն կորուստ ի դեմս Ժոաու Ֆելիշի, մինչդեռ «Լիվերպուլի» գլխավոր հարվածայինները կազմ ու պատրաստ են։ Վերջերս ապաքինվել է Սադիո Մանեն ու անգամ հասցրել է «Նորվիչի» դեմ խաղում խփել հաղթական գնդակը։
«Բորուսիա» Դորտմունդ — «Պարի Սեն Ժերմեն»
Ա՜յ այստեղ իսկական շոու է սպասվում, ա՜յ այստեղ կարող է լինել ամեն ինչ։ «Պարի Սեն Ժերմենը» բավական լավ ֆուտբոլ ցուցադրեց խմբային փուլում։ Երեկ կայացած մամուլի ասուլիսի ժամանակ Թոմաս Տուխելը հանդարտեցրեց բոլորին՝ հայտնելով Նեյմարի խաղալու մասին։ Բրազիլացին պատրաստ է այսօրվա խաղին։ Սա անչափ կարևոր է, քանի որ Նեյմարը հիմա լավ մարզավիճակում է ու ցանկանում է շատ բան տալ իր թիմին։ Գերազանց է Կիլիան Մբապեն։ Իկարդի, դի Մարիա․ այս ֆուտբոլիստները ևս լավ վիճակում են։
«Բորուսիան» Լյուսիեն Ֆավրի գլխավորությամբ դարձել է Եվրոպայի ամենազվարճալի թիմերից մեկը։ Բունդեսլիգայի 22 խաղերում խփած 62 գոլ ու 32 բաց թողած։ Հոլանդը փորձելու է Բունդեսլիգայի տրիումֆերը տեղափոխել ՉԼ։ Թեպետ ՉԼ-ում էլ նա պակասը չի եղել։
Ի՞նչ սպասել այս դիմակայությունից։ Այստեղ իսկապես կարող են լինել երկու զվարճալի խաղեր բազմաթիվ գոլերով։ Թե՛ «Բորուսիան», թե՛ Փարիզը ունեն հիանալի հարձակման գիծ ու պաշտպանություն, որոնցում առկա են խնդիրներ։ ՊՍԺ-ն Լիգա 1-ի վերջին խաղում 4-4 հաշվով ոչ-ոքի խաղաց «Ամյենի» հետ։ «Բորուսիան» էլ մեկ տուր առաջ 3-4 հաշվով զիջեց «Բայերին»։ «Կայֆ ա չէ՞»։
Գերմանական ակումբը միանշանակ շեշտը դնելու է տնային խաղի վրա։ Դորտմունդի համար տնային խաղերը միշտ էլ անկյունաքարային նշանակության են լինում։ Նրանց երկրպագուները կարող են շարքից հանել ցանկացած թիմի։ Այդ է պատճառը, որ այսօրվա խաղում Լյուսիեն Ֆավրի թիմը կարող է դիտվել որպես փոքրիկ ֆավորիտ։
Իհարկե, այս դիմակայությունում կա մի բան, որի մասին չխոսել անկարող ենք։ Խոսքը Թոմաս Տուխելի մասին է։ Դորտմունդի «Բորուսիայի» նախկին գլխավոր մարզիչը վերադառնալու է «Վեստֆալեն» արենա։ Սա սկզբունքային մրցավեճ է գերմանացի մասնագետի համար։
ՊՍԺ-ի համարձակության ու «Բորուսիայի» մոտիվացիայի մասին
Փարիզյան ակումբի վրա ճնշումը մեծ է։ Նրանց սպորտային տնօրենի՝ օրեր առաջ հնչեցրած խոսքերով ՊՍԺ-ում խաղում են մոլորակի ուժեղագույն չորս ֆուտբոլիստներից երկուսը՝ Նեյմարը և Մբապեն։ Եթե նրանք ձախողվեն և չկարողանան ՉԼ-ն հաղթել նաև այս տարի, ապա ի՞նչ արդարացում է գտնելու Լեոնարդոն։ Ֆրանսիայի չեմպիոնի համար այս տարի ևս Չեմպիոնների լիգայի գավաթը գլխավոր նպատակն է, նրանց վրա ճնշումը մեծ է։ Գուցե հենց դա է խանգարել ՊՍԺ-ին նախորդ տարիներին հաղթահարել գոնե քառորդ եզրափակչի արգելքը։
Ի տարբերություն Էյֆելյան աշտարակի պատկերը սեփական էմբլեմայի վրա կրող թիմի՝ «Բորուսիան» չունի նման ճնշման խնդիր։ Այո՛, 2013-ին թիմը եղել է ՉԼ-ի եզրափակչում, բայց հիմա նրանց երկրպագուները նման թռիչքային աճ չեն ակնկալում ու պարտության դեպքում ողբերգություն չեն սարքելու։ Սա կարող է օգնող գործոն լինել Լյուսիեն Ֆավրի թիմի համար։ Նրանք կարող են «թուլացած» դուրս գալ դաշտ ու հաճույք ստանալ ֆուտբոլից։ Մանավանդ այն պարագայում, որ թիմի որոշ ֆուտբոլիստներ, օրինակ Աշրաֆ Հակիմին, հնարավոր է վերջին մրցաշրջանն են անցկացնում դորտմունդյան ակումբի կազմում։
Կա կանաչ դաշտ ու 90 րոպե, տվյալ դեպքում 180, քանի որ դիմակայությունները բաղկացած են երկու խաղից։ Երբ գալիս է խաղալու պահը, ֆուտբոլիստները մոռանում են վիճակագրությունների, նախախաղային գործոնների ու մնացյալ ամենի մասին, տրվում են 100 տոկոսով, քանի որ վայրկյաններ առաջ իրենց ականջներում լսել են այդ հեքիաթային ձայնը, որն ասում է․’’The Champions…’’
Արամ Սահակյան
