Իռլանդիայի դեմ խաղում Հրայր Մկոյանը մոտ 3.5 տարվա դադարից հետո կրկին հանդես եկավ Հայաստանի ազգային հավաքականում: ՀՖՖ TV-ի հետ զրույցում Մկոյանը հիշել է իր նորամուտը հավաքականի կազմում, պատմել, թե որն է եղել իր ամենահիշարժան հանդիպումը, որ մարզիչն է ամենամեծ դերն ունեցել իրա կարիերայում և ինչ է ֆուտբոլն իր համար
«Հավաքականի կազմում հանդես գալիս խաղի օրը մեծ պատասխանատվություն ես զգում, որ քեզ վստահել են, դու այդ խաղին պետք է դուրս գաս խաղադաշտ, օգուտ տաս քո հավաքականին և ուրախացնես երկրպագուներին: Շատ մեծ պատասխանատվություն ու ոգևորություն ես զգում: Ուզում ես ամեն ինչ անել օգուտ տալու համար»,- ասել է Մկոյանը:
Մկոյանի համար հիշարժան է իր նորամուտի խաղը՝ Բելգիայի դեմ. «Կար մեծ լարվածություն, քանի որ առաջին անգամ էի հանդես գալիս հավաքականի կազմում: Ուզում էի լավ հանդես գալ: Ամեն ինչ հաջող դասավորվեց մեզ համար: Լավ խաղացինք ու 2-1 հաշվով հաղթեցինք այդ խաղում»:
Մկոյանն ընդգծել է՝ շատ կան մարզիչներ, ովքեր իրեն օգնել բարձր արդյունքների հասնելու հարցում, բայց առանձնացրել է Հայաստանի հավաքականի նախկին գլխավոր մարզիչ Վարդան Մինասյանին. «Ինքն է ինձ առաջինը վստահել հավաքականում խաղալու համար: Իմ կարիերայում նա շատ մեծ դեր է ունեցել: Ինձ ուժ և վստահություն է տվել, որ կարող եմ խաղալ: Նրա հետ շատ հեշտ էր աշխատելը»:
Հայաստանի հավաքականի պաշտպանը խոսել է նաև թիմակիցների մասին.
«Հավաքականում շատ ուժեղ խաղացողներ ենք ունեցել, կառաձնացնեմ Մխիթարյանին ու Մովսիսյանին, թեև չեմ ուզի մյուսներին նեղացնել, քանի որ իսկապես շատ բարձրակարգ խաղացողներ ենք ունեցել, բոլորն էլ ուժեղ էին ու հարց լուծող տղաներ էին»,- ասել է Մկոյանը:
