Armsport-ի ֆոտոլրագրող Գևորգ Ղազարյանն աշխատել է Կրիշտիանու Ռոնալդուի մասնակցությամբ 8 տարբեր հանդիպումների ժամանակ։ Այդ թվում ընդդեմ Հայաստանի հավաքականի խաղում 2015 թվականին, ապա Ռուսաստանի Դաշնությունում կայացած Կոնֆեդերացիաների գավաթի խաղարկությունում՝ 2017 թվականին, որտեղ Պորտուգալիան ներկայացած էր որպես Եվրոպայի չեմպիոն ընտրանի և, իհարկե, վերջին Աշխարհի առաջնության ժամանակ, 2018 թվականին, որը նույնպես տեղի ունեցավ Ռուսաստանում։
Armsport-ն իր արխիվում փնտրել է այսօր իր 35-ամյակը նշող աշխարհահռչակ պորտուգալացու լավագույն լուսանկարները։
Եվրոպայի առաջնության ընտրական փուլի խաղում Հայաստանի հավաքականը սեփական հարկի տակ իսկական պայքար մղեց Եվրոպայի ապագա չեմպիոնների հետ։ Ռոնդալուն փայլեց այդ խաղում՝ դառնալով հեթ-տրիկի հեղինակ. Արդյունքում 3:2՝ հօգուտ հյուրերի։ Երկու լուսանկարներն էլ մեկ օր ավելի վաղ տեղի ունեցած նախախաղային մարզումից են, որտեղ Ռոնալդուն և թիմակիցները ներկայացան գերբարձր տրամադրությամբ։ Երևանյան շոգ եղանակին դիմանալու համար Ռոնալդուն խաղադաշտ դուրս եկավ պաշտպանիչ քսուքով պատված դեմքով։ Իսկը իր ոճի մեջ։
Արդեն Եվրոպայի չեմպիոն հռչակված Պորտուգալիայի ազգային հավաքականը պատրաստվում էր գալիք Աշխարհի առաջնությանը։ Իսկ մինչ այդ տեղի ունեցող բոլոր պատասխանատու մրցաշարերից հատկապես կարևոր է Կոնֆեդերացիաների գավաթը։ Ինչպես ամեն անգամ, այնպես էլ 2017 թվականին այն անցկացվեց երկրում, որն ընդունելու էր գալիք Աշխարհի առաջնությունը՝ Ռուսաստանի Դաշնությունում։ Խմբային փուլի խաղում Պորտուգալիան հանդիպեց Մեքսիկայի հետ։ Գրանցվեց ոչ-ոքի՝ 2:2: Ռոնալդուն գոլի հեղինակ չդարձավ, սակայն խաղից առաջ բոլորն անհամբեր սպասում էին աշխարհի ամենաուժեղ պորտուգալացու ժամանմանը։ Ռոնալդուի ուղեկցությամբ խաղադաշտ դուրս եկած այս երեխայի ուրախությունը վկա։
Խմբային փուլի հաղթահարումից հետո եկավ կիսաեզրափակիչ դիմակայության ժամանակը, որտեղ արդեն Ռոնալդուի ու նրա ընկերների առջև կանգնեցին համառ չիլիացիները Վիդալի ու Բրավոյի գլխավորությամբ։ Պորտուգալիայի ընտրանին պարտվեց 11 մետրանոց հարվածաշարում, որտեղ օրվա գլխավոր հերոսը Կլաուդիո Բրավոն էր, Չիլիի ընտրանու դարպասապահը։
Ինչպես յուրաքանչյուր աշխարհահռչակ ֆուտբոլիստ, Ռոնալդուն ևս երազում է դառնալ աշխարհի չեմպիոն։ Այս տիտղոսը, ինչպես և ֆուտբոլային աշխարհում նրա գլխավոր մրցակցին՝ Լեո Մեսսիին, դեռևս չի տրվել։ 2018 թվականին ներկայացավ այն նվաճելու ևս մեկ շանս։ Պորտուգալիան աշխարհի առաջնությունը սկսեց ֆանտաստիկ խաղով ընդդեմ խմբում հիմնական մրցակից Իսպանիայի։ Սոչիի «Ֆիշտ» ստադիոնում տեղի ունեցած հանդիպումը բավարարեց բոլորի սպասելիքները՝ 11 մետրանոց, տուգանայինից գոլ Ռոնալդուի կատարմամբ, թեժ պայքար ու իհարկե, գոլեր, միանգամից 6-ը։ Ռոնալդուի ֆանտաստիկ տուգանայինից հարվածը բերեց պորտուգալացիների առաջին միավորը՝ 3:3:
Ի զարմանս շատերի, Ռոնալդուն շարունակում է ցույց տալ բարձրակարգ ֆուտբոլիստի փայլուն որակներ։ Պորտուգալացին շարունակում է պայքարը հանուն գալիք մեծ տիտղոսների ու մենք էլ մեր հերթին հուսով ենք, որ գալիք տարիների ընթացքում դեռ հնարավորություններ կունենանք նրան հանդիպելու ու փաստավավերագրելու մեր ժամանակների լավագույն ֆուտբոլիստներից մեկի խաղերի լավագույն դրվագները։
Մինչ հանդիպում Ռոնալդու …
