Ռուսաստանի ամենահեռանկարային ֆուտբոլիստներից մեկը տեղափոխվեց Մոսկվայի «Սպարտակ»։ Առաջին հայացքից, սովորական, արևելաեվրոպական տրանսֆեր․․․ Սակայն, մենք ականատես դարձանք մի խնդրի (չնայած շատ ֆուտբոլիստներ այդ կարծիքին չեն), որին վերջին տարիներին բախվում է ռուսական ֆուտբոլը․ բազմաթիվ երիտասարդ ֆուտբոլիստներ չեն ցանկանում տեղափոխվել արևմտաեվրոպական լիգաներ՝ նախընտրելով մնալ ՌՊԼ-ում։ Պատճա՞ռը․․․ Հավանաբար շատերի համար գաղտնիք չէ՝ բարձր աշխատավարձ և գրեթե հիմնական կազմում երաշխավորված տեղ․․․ Եվ այսպես․
Ալեքսանդր Սոբոլև
Այսօրվա մեր հերոսը ՌՊԼ-ի ներկայացուցիչ, ներկա պահին առաջնության գլխավոր ռմբարկուներից մեկն է՝ Ալեքսանդր Սոբոլևը։ Ռուս հարձակվողը, ով ընդամենը 22 տարեկան է, հիանալի մրցաշրջան է անցկացնում «Կռիլյա Սովետովի» կազմում և, նույնիսկ, հասցրել է գրավել Ռուսաստանի հավաքականի բնավորությամբ սկզբունքային գլխավոր մարզիչ Չերչեսովի ուշադրությունը:
Ռուսաստանի առաջնությունում Սաշան արդեն հասցրել է աչքի ընկնել 10 գոլով: Այն էլ ինչ գոլերով…🤩
18 խաղ, 10 գոլ. «Կռիլյա Սովետովը» մեծամասամբ հենց Սոբոլևի հիանալի մարզավիճակի շնորհիվ էր, որ մի պահ գտնվում էր մրցաշարային աղյուսակի 7-րդ տեղում (ներկայումս 15-րդն է): Իսկ մրցաշրջանի մեկնարկում Սամարան ներկայացնող միակ ակումբը համարվում էր առաջնության բացահայտ աուտսայդերներից մեկը՝ մրցաշարը հաջորդ տարվա գարնանը լքելու գլխավոր թեկնածուների ցուցակում գտնվելով: Մի րոպե… պատկերացրե՛ք…10 գոլ՝ թիմի 20 գոլերից: Այսինքն թիմի խփած գոլերի ուղիղ կեսը հենց Սոբոլևի հաշվին է… Դա պարզապես հիանալի ցուցանիշ է…
Ալեքսանդրի ֆուտբոլային տաղանդների շրջանակը ավելի լայն է, քան սովորական «փայտե» կենտրոնական հարձակվողներինը: Եվ տարիքը հարմար է ադապտացվելու համար: Մեծ ակումբների սկաուտները հետևում են բառացիորեն բոլորին. և երիտասարդական թիմերին, և ավելի համեստ առաջնությունների ակումբներին, ապրում են Հարավային Ամերիկայում և Ասիայում, Աֆրիկայում և Բալկաններում՝ շատ հաճախ գտնելով նորանոր տաղանդներ և ապագա ֆուտբոլային աստղեր այնտեղից, որտեղից քչերն են սպասում:
Եվ դեկտեմբերին բոլորովին պատահական չէր, որ եվրոպական առաջատար առաջնությունների ակումբներից բավականին ներկայացուցչական ցուցակ էր կազմվել, ովքեր ցանկանում էին իրենց կազմում տեսնել ռուս հարձակվողին:
Ովքե՞ր էին հետաքրքված
«Բորուսիա Դ», «Մանչեսթր Յունայթեդ», «Վիլյառեալ», «Արսենալ»․․․
«Բորուսիա Դ»-ն Դեմբելեին վերցրեց «Ռենից» 15 միլիոն եվրոյի դիմաց, իսկ հետո Գերմանիայում բոլորը ասացին, որ վճարված գումարը սահմանվածից բարձր էր: Մեկ տարի անց Ուսմանը 125 միլիոն արժեր: Սանչոն գնաց խորամանկ գերմանացիների ճամբար 7,8 միլիոն եվրոյի դիմաց, և այժմ պայմանական «Յունայթեդը» պետք է վճարի մոտ 100 մլն, որպեսզի 19-ամյա անգլիացին վերադառնա հայրենիք:
Գերմանական ակումբը ամենաակտիվն էր հետաքրքրված Սաշայի ծառայություններով՝ առաջարկելով նրա համար 10-15 մլն եվրո: Մանչեսթրյան ակումբը ևս հետաքրքրված էր ռուս հարձակվողով՝ չնայած ակումբի ներկայացուցիչները ավելի պասիվ են իրենց գերմանացի գործընկերներից: Արդյունքում, գերմանական ակումբում այժմ փայլում է Հոլանդը, և վստահորեն կարելի է ասել, որ դորտմունդցիների երկրպագուները ավելի երջանիկ են տեսնել թիմում նորվեգացուն, քան դա կլիներ Սաշան։
Սոբոլևի գործող պայմանագիրը ակումբի հետ ուժի մեջ էր մինչև 2021 թվականը: «Արդյո՞ք Սոբոլևը կկատարի իր պարտականությունները մինչև վերջ: Իհարկե, մենք կցանկանայինք միշտ ունենալ այդպիսի խաղացող մեր թիմում: Մենք շատ հպարտ ենք նրա՝ հավաքականի հրավերով: Դա մեծ բան է մեր թիմի համար: Իհարկե, նա թիմի համար շատ օգտակար անձնավորություն է, բայց մենք ստրկատեր էլ չենք», — ասել է Ֆետիսովը՝ «Կռիլյա Սովետովի» նախագահների խորհրդի ներկայացուցիչը, ակնարկելով՝ որ իրենք բաց են Սոբոլևի համար շռայլ առաջարկությունների համար:
Որտե՞ղ հայտնվեց Սաշան…
«Կռիլյա Սովետովի» հարձակվող Ալեքսանդր Սոբոլևը մրցաշրջանի մնացած հատվածը վարձավճարով կանցկացնի «Սպարտակում»: Մոսկովյան ակումբը ամռանը կարող է գնել 22-ամյա հարձակվողի ամբողջական տրանսֆերը․․․ Անսպասելի էր, անկեղծ ասած։ Սակայն դա արդեն կախված էր հենց ֆուտբոլիստից․ ընտրել կարիերայի առաջխաղացման արևմտյան ուղին, թե… մենք կարող ենք ականատես լինել ռուս հերթական տաղանդի տեղափոխությանը մայրաքաղաք: Եվ այդպես էլ եղավ․․․ Կարիերայի աճ, թե՞ բարձր աշխատավարձ… Եվս մեկ ապացույց, որ գումարը որոշում է շատ բան ֆուտբոլում։
Վար Բաբայան
