Տրանսֆերային պատուհանի ընթացքում թիմերը նոր պայմանագրերից զատ, նաև խզում են պայմանագրերը: Որոշ ֆուտբոլիստներ արդեն իսկ նոր թիմերում են, իսկ ոմանք էլ դեռևս ազատ խաղացողի կարգավիճակում են:
ArmSport-ը ներկայացնում է այն հայ ֆուտբոլիստներին, որոնք դեռևս որևէ թիմի հետ պայմանագիր չեն ստորագրել: Իհարկե, տրանսֆերային պատուհանի ընթացքում գործընթացը շարունակական է, քանի որ մի շարք փոփոխություններ են լինում, ուստի շարքը կլինի թարմացվող:
Միհրան Մանասյան. դիրքը՝ հարձակվող, տարիքը՝ 31
«Ալաշկերտի» պատմության լավագույն ռմբարկուն հեռացել է գործող գավաթակրի կազմից, որտեղ անցկացրել է իր կարիերայի լավագույն և ամենաարդյունավետ պահերը:
Մանասյանը նախորդ տարվա ամռանը «Գանձասար-Կապանից» է վերադարձել «Ալաշկերտ»: Առաջնության առաջին հատվածում նա անկայուն խաղաժամանակ էր ստանում՝ հիմնականում մտնելով փոխարինման:
Միրոյի որակները, հատկապես գոլային հոտառությունը կարող է օգուտ բերել հայկական յուրաքանչյուր թիմի:
Հովհաննես Պողոսյան. դիրքը՝ կիսապաշտպան, տարիքը՝ 26
Հովհաննես Պողոսյանը՝ իր սերնդի ամենատաղանդավոր ֆուտբոլիստներից մեկը, հեռացել է «Փյունիկից»: Հովհաննեսի տաղանդը լիովին բացահայտելու համար հարթակ է հարկավոր, որը դեռևս չկա: Նախկինում վարձավճարով հանդես եկավ «Արցախում», այնուհետև վերադարձավ հարազատ թիմ, որտեղ շարունակեցին անհանգստացնել վնասվածքները:
Հովհաննես Պողոսյանն աչքի է ընկնում կրեատիվ գործողություններով. այդ հանգամանքը Բարձրագույն խմբում կարող է եղանակ ստեղծել:
Հովհաննես Իլանգյոզյան. դիրքը՝ հարձակվող, տարիքը՝ 23
Վերջին տարիներին Իլանգյոզյանը Հայաստանի ամենահեռանկարային ֆուտբոլիստներից մեկն էր համարվում, սակայն նրա աստղը այդպես էլ չփայլեց:
Նախկին «Բանանցում» Հովհաննեսը կայուն խաղաժամանակ էր ստանում, սակայն տեղափոխվելով «Փյունիկ»՝ նա հիմնականում հանդես եկավ Առաջին խմբում: Երկրի երկրորդ լիգայում Հովհաննեսը շատ լավ ելույթներ էր ունենում: Ամեն դեպքում, երիտասարդ խաղացողը նաև ԲԽ-ում հանդես գալու լավ փորձ ունի. ընդհանուր առմամբ մասնակցել է 26 հանդիպման. ճիշտ է՝ այդտեղ արդյունավետությունը կաղում է. ընդամենը 2 գոլ: Կարիերայի ընթացքում Առաջին խմբի 7 տասնյակ հանդիպումներում Հովհաննեսը 19 գոլ է խփել, և բարձր արդյունավետություն է ցույց տվել նաև գոլային փոխանցումների հաշվարկում՝ կատարելով 9 արդյունավետ փոխանցում: Իլանգյոզյանը կենտրոնական հարձակվողի բուն պարտականությունից զատ նաև շատ լավ է գործում ենթահարձակվողի դիրքում:
Դավիթ Ղանդիլյան. դիրքը՝ հարձակվող, տարիքը՝ 26
Մրցաշրջանի մեկնարկից առաջ Ղանդիլյանը տեղափոխվեց «Ալաշկերտ»: Առաջին խմբում Ղանդիլյանը շատ արդյունավետ խաղ ցուցադրեց. առաջնության առաջին հատվածում 12 գոլ:
Դավիթին բնորոշ է արագությունը: Բացի այդ, նա խառը իրավիճակներում արագ է կողմնորոշվում և, գումարած այդ ամենին, ունի գոլային հոտառություն: «Շիրակի» սանը, որպես 2-րդ հարձակվող, կարող է օգտավետ լինել հայկական թիմերի համար
Շարունակելի…
Արման Առաքելյան
