Չարենացավաի «Վանը» հաղթանակով մեկնարկեց Ֆուտբոլի Հայաստանի Պրեմիեր լիգայում: Բարձրագույն լիգայում նորամուտի խաղում Սևադա Արզումանյանի գլխավորած թիմը Չարենցավանի քաղաքային մարզադաշտում ընդունեց «Գանձասար-Կապանին» և առավելության հասավ 2:1 հաշվով: Տանտերերի կազմում նորամուտը նշեց և այն հաղթական գոլով նշանավորեց 31-ամյա Միհրան Մանասյանը: Փորձառու ֆուտբոլիստը, որն առավել հայտնի է «Ալաշկերտում» իր հաջող ելույթներով, գոլի հեղինակ դարձավ փոխարինման մտնելուց հետո:
ArmSport-ի հետ զրույցում Մանասյանը խոսեց «Լոռիից» չարենցավանյան թիմ տեղափոխության, նորամուտի խաղի և այլ թեմաների մասին:
«Այլ թիմ տեղափոխվելու տարբերակներ շատ չունեի: Ես ինքս ցանկություն ունեի խաղալ «Վանում» և կապվեցի մարզիչ Սևադա Արզումանյանի հետ, քանի որ միասին աշխատելու փորձ արդեն ունեինք: Նոր ակումբ է և ինքս ցանկացա հանդես գալ թիմում: Ակումբի պատասխանը եղավ դրական և իրենք էլ շատ ուրախացան:
Ես Սևադա Արզումանյանի հետ աշխատել եմ նաև «Ուլիսում», և հիմա էլ մեր աշխատանքը շատ լավ ստացվում է: Թիմի առջև բարձր հորիզոնական զբաղեցնելու խնդիր է դրված: Իմ կարծիքով գնալով ավելի կուժեղանանք: Ակումբի ղեկավարությունը շատ լուրջ է տրամադրված: Ճիշտ է շատ բան կախված է նաև մեզանից»,- ասում է Մանասյանը:
Խոսելով իր մարզավիճակի մասին Մանասյանն ասաց.
«Շատ լավ մարզավիճակում եմ: Օրը 2 մարզում ենք անցկացնում: Սևադա Արզումանյանի և մարզչական շտաբի հետ աշխատելը շատ հաճելի է: Կարևորը լավ մթնոլորտ է, հաճելի է և ամեն ինչ դրական է, ինչը ավելի է մոտիվացնում: Ես ամենատարեց ֆուտբոլիստն եմ թիմում և շատ բան կախված է ինձանից, որ օրինակ ծառայեմ երիտասարդ խաղացողների համար: Թիմն ինձ վսհատում է և ես էլ պետք է իմ խաղով ապացուցեմ նրանց, որ չեն սխալվել»:
Մանասյանը կարիերայի ընթացքում 3 անգամ ճանաչվել է առաջնության լավագույն ռմբարկու: Վերջին տարիներին հայ ֆուտբոլիստն իր թիմերում քիչ էր խաղաժամանակ ստանում և հնարավորություն չէր ստանում իր ամբողջ ներուժն օգտագործելու.
«Անկեղծ ասաց ինձ միշտ մարդիկ են խանգարել: Ես միշտ ունեցել եմ իմ նպատակները: Որոշ մարզիչներ իրենց անիմաստ փիլիսոփայության պատճառով ինձ շատ խաղաժամանակ չեն տրամադրել, չգիտեմ ինչն է եղել պատճառը, բայց դա ինձ ավելի ուժեղ է դարձրել: Ճիշտ է, ես չարացած չեմ այդ մարդկանց հանդեպ, բայց շատ մարզիչներ ավելի շատ վնաս են տվել ինձ, քան օգուտ: Անուններ չեմ ուզում նշել, էլի եմ ասում, ես այդ մարդկանց հանդեպ չարացած չեմ: Ես միշտ էլ երբ խաղացել եմ, փորձել եմ մաքսիմալ օգուտ տալ տվյալ թիմին: Հիմա 31 տարեկան եմ, բայց դա ինձ ոչինչ չի ասում, խաղադաշտում ես ինձ ավելի երիտասարդ եմ զգում»:
Իր կարիերայի լավագույն տարիները Մանասյանն անցկացրել է Երևանի «Ալաշկերտում», որի կազմում 3 անգամ դարձել է Հայաստանի չեմպիոն. «Ալաշկերտից» հետո Մանասյանը տեղափոխվեց «Գանձասար-Կապան», որտեղ 1 տարի անցկացնելուց հետո վերադարձավ հարազատ թիմ, իսկ նախորդ մրցաշրջանի վերջնամասում հանդես էր գալիս Վանաձորի «Լոռիում».
«Լավագույն տարիներս անցկացրել եմ «Ալաշկերտում»: «Ալաշկերտը» ինձ համար լրիվ այլ ակումբ է: Ես շատ եմ նվիրվել այդ թիմին: «Ալաշկերտի» հետ տեսել եմ և՛ վատը, և՛ լավը: Ակումբը միշտ իմ սրտում է և իմ լավագույն տարիներն անցկացրել եմ այդտեղ:
Նույնիսկ շատ առաջարկներ եմ ստացել արտասահման տեղափոխվելու, բայց մերժել եմ, որ մնամ «Ալաշկերտում», ու չեմ փոշմանում այդ ամենի համար: Ընդհանուր առմամբ հիմա եթե հետ նայեմ, տեսնեմ թե ոնց եմ նվիրվել ակումբին և ինչ պատասխան վերաբերմունք եմ ստացել, գուցե ինչ-որ տեղ ճիշտ լիներ տեղափոխությունս, բայց իմ արածների համար երբեք չեմ զղջում և նորից եմ կրկնում, որ «Ալաշկերտն» ինձ համար այլ նշանակություն ունեցող ակումբ է»:
Մանասյանի խոսքով Հայաստանի առաջնության խաղամակարդակը վերջին 2-3 տարիներին շատ է աճել, սակայն շատերիս անհանգստացնող խնդիրը շարունակում է մնալ.
«Որակապես շատ աճել է Հայաստանի առաջնությունը և այդ դրական փոփոխությունը բոլորը տեսնում են, բայց ես կցանկանայի ավելի շատ խաղաժամանակ ստանային հայ երիտասարդ ֆուտբոլիստները, հատկապես մինչև 19 և 21 տարեկանները: Ճիշտ է, հիմա կա լիմիտ, բայց դա շատ քիչ է: Երիտասարդ խաղացողները շատ ունեն խաղաժամանակ ստանալու կարիք»:
Չնայած Հայաստանի առաջնություններում իր հաջող ելույթներին, Մանասյանն, այնուամենայնիվ, երբեք չի հրավիրվել Հայաստանի ազգային հավաքական:
«Երբ Արցախի հավաքականի կազմում մասնակցեցի չճանաչված պետությունների Աշխարհի առաջնությանը, դրանից հետո ազգային հավաքականի մարզիչներն ինձ ցանկանում էին հրավիրել հավաքական, բայց հետո ասացին որ խնդիր կա, քանի որ արդեն խաղացել եմ Արցախի հավաքականում: Ինձ այդպես են մեկնաբանել հավաքական չհրավիրելը»,-ասաց Մանասյանը:
Վերջում հայ ֆուտբոլիստը հաջողություն մաղթեց հայկական թիմերին եվրագավաթների գալիք մրցաշրջանում:
Երվանդ Հակոբյան