«Ալաշկերտը» մրցաշրջանի երկրորդ հատվածին մոտենում է հին-նոր գլխավոր մարզչով, բազմաթիվ նորեկներով ու մեծ նպատակներով։ «Ալաշկերտ» վերադառնալու, թիմի նպատակների, ուսումնամարզական հավաքի ընթացքի և այլ թեմաների շուրջ Armsport-ը զրուցել է թիմի գլխավոր մարզիչ Աբրահամ Խաշմանյանի հետ։
— Պարո՛ն Խաշմանյան, բարի վերադարձ հայկական ֆուտբոլ։ Գրեթե մեկ տարի չաշխատելուց հետո ձեր վերադարձի պատճառը ֆուտբոլը կարոտե՞լն էր, թե՞ ներկա փուլում «Ալաշկերտի» նպատակներն ու գաղափարները համընկել են ձեր նպատակների ու գաղափարների հետ։
— Կարո՞տը․․․Ես միշտ էլ եղել եմ ֆուտբոլի մեջ։ Այնպես չէ, որ կտրված եմ եղել ֆուտբոլից, բոլորն էլ քաջատեղյակ են։ Ինչ վերաբերում է «Ալաշկերտ» վերադարձին, ապա պետք է ասեմ, որ ես կարող էի գլխավորել թիմը դեռ անցած տարի։ Ունեի ռեալ հրավեր, բայց որոշ հանգամանքներից ելնելով՝ չգլխավորեցի թիմը։ Հետո փոշմանել եմ, պետք է հենց անցած տարի գլխավորեի «Ալաշկերտը»։ Ինչևիցե դա անցած ժամանակահատված է, ու չեմ կարծում, թե դրա մասին խոսելը հիմա էական է։
«Ալաշկերտը» իր կարճ պատմության մեջ հասել է մեծ հաջողությունների։ Ես չեմ հիշում որևէ երկրորդ ակումբ, որը նման կարճ ժամանակահատվածում հասած լինի այսպիսի հաջողությունների, իսկ «Ալաշկերտը» հասել է։ Այս թիմում կա մեկ նպատակ՝ միշտ լինել առաջատարների խմբում ու միշտ ձգտել տիտղոս նվաճել, այլ տարբերակ չի քննարկվում։ Այս ակումբը գրեթե միշտ արել է դա։ Վերջին ժամանակներում դա անել չի հաջողվել։ Հիմա թե՛ ղեկավարի, թե՛ ակումբի, թե՛ իմ ընդհանուր գաղափարները համընկնում են։
Իմ վերադարձը կապված է դրա հետ, որպեսզի մենք կարողանանք համատեղ աշխատանքով անենք այնպես, որ «Ալաշկերտը» լինի շատ լավ դիրքերում։ Նպատակը մեկն է․ տիտղոս նվաճելը։ Թե ինչ տիտղոս կլինի, չեմ կարող ասել, բայց նպատակը դա է։ Կհասնենք դրան, թե ոչ՝ դա երկրորդական է։ Կարևորը, որ կա նպատակ, որ մենք ձգտում ենք դրան։ Այսօր դա անելը հեշտ չէ, քանի որ թիմերը բավականին ուժեղացել են, մեծ ռեսուրսներ են ծախսում, բարձրակարգ ֆուտբոլիստներ են բերում։ Հեշտ չի լինելու։
— Ձեր վերադարձից հետո ակումբը մի շարք տրանսֆերներ իրականացրեց։ Շատ էին համալրումները պաշտպանության գծում։ Ձեր կողմից եղե՞լ էր կոչ, որ հենց խաղային այդ դիրքում են համալրումներ պետք։
— Այո, ու դա բնական է, քանի որ մինչև այս խաղացողների գալը մենք նոմինալ մեկ պաշտպան ունեինք։ Ընկերական առաջին 3 խաղերում ես ունեցել եմ մեկ կենտրոնական պաշտպան՝ Տարոն Ոսկանյանը։ Ինձ համար ցանկալի կլիներ, որ պաշտպանողական գծի խաղացողները ոչ թե հիմա համալրեին թիմը, այլ առաջին օրվանից։
Այս մասին ես շատ եմ խոսել․ այն խաղացողները, որոնք ավելի ուշ են միանում թիմին, գտնվում են ոչ պատրաստ վիճակում։ Մենք աշխատանքները սկսում ենք, ֆիզիկական ու ֆունկցիոնալ առումով մոտ մեկ ամիս բավականին ծանրաբեռնված աշխատում ենք, իսկ այդ խաղացողները դեռ չկան։ Հետո երբ նրանք միանում են մեզ, թիմը լինում է ֆունկցիոնալ ու ֆիզիկական պատրաստության այլ մակարդակի վրա, իսկ այդ խաղացողները՝ այլ։ Սա ևս մեկ խնդիր է։ Լավ է, որ մենք արել ենք այդ համալրումները։ Ճիշտ է, ունենք կարճ ժամանակ, բայց հուսով եմ կկարողանանք ճիշտ կազմակերպել, ու նրանք պատրաստ կլինեն առաջնության առաջին հատվածին։
— Ինչպե՞ս կգնահատեք հավաքի ընթացքը։ Թիմը պատրա՞ստ է մրցաշրջանի երկրորդ հատվածին։
-Թիմը պատրաստ կլինի առաջնության երկրորդ հատվածին՝ հենց սկզբից։ Նշեցի, որ ֆուտբոլիստները ուշ են միանում թիմին, ինչը բարդացնում է մեր գործը։ Ինչ վերաբերում է թիմի պատրաստ լինելուն, այո՛, թիմի ֆուտբոլիստների 70-80 տոկոսը պատրաստ կլինեն ամբողջությամբ։ Այստեղ հիմնական խնդիրը այն խաղացողներին է վերաբերում, որոնք ուշ են միացել թիմին։ Այսինքն, թիմի ֆունկցիոնալ վիճակը կարող է լինել 80-90 տոկոսի վրա, իսկ այդ ֆուտբոլիստինը՝ 60-ի վրա։ Այստեղ կլինեն խնդիրներ ու տատանումներ, բայց կարծում եմ դա էլ ժամանակի հարց է, ու մենք կարող ենք լուծել այդ հարցը։
Արամ Սահակյան
