Հայաստանի ազատ ոճի ըմբշամարտի հավաքականը Հաբեթնակ Կուրղինյանի գլխավորությամբ արդեն մեկ շաբաթ է՝ հավաք է անցկացնում Ծաղկաձորում. 4-ամսյա դադարից հետո սա ազատ ոճայինների առաջին համատեղ հավաքն է, ու հավաքականի գլխավոր մարզչի խոսքով՝ տղաների մարզավիճակը գոհացնում է:
«Չորս ամիս է՝ հավաք չէինք անցկացրել, ու այդ ֆոնին՝ տղաների ֆիզիկական վիճակն այս պահի դրությամբ նորմալ եմ գնահատում: Այս մեկ շաբաթվա ընթացքում ընդհանուր պատրաստվածության վրա ենք շեշտը դրել, առավոտյան բացօթյա մարզումներ ենք ունենում, տղաները նաև սար են բարձրանում, Ծաղկաձորի բնությունը հիանալի է, եղանակն էլ շատ լավը… նաև շատ կարևոր է այն, որ վերջապես միասին են մարզումներն իրականացնում»,- ArmSport-ի հետ զրույցում ասել է Հաբեթնակ Կուրղինյանը:
Ավելի վաղ հայտնի էր դարձել, որ ազատ ոճի ըմբշամարտի Հայաստանի հավաքականում կորոնավիրուսի թեստերի պատասխաններից մեկը դրական է. Հաբեթնակ Կուրղինյանի խոսքով, այդ մարզիկը թիմի հետ չի մեկնել Ծաղկաձոր.
«Հավաքականի՝ կորոնավիրուսով վարակված մարզիկը մնացել է Երևանում, այս օրերին նրան երկրորդ անգամ պետք է թեստավորեին: Ճիշտն ասած՝ ավել տեղեկության չեմ տիրապետում, իսկ Ծաղկաձորում գտնվող բոլոր ըմբիշներն առողջ են ու իրենց շատ լավ են զգում: Բոլորի թեստերի պատասխանները բացասական են: Բացի այդ մարզիկից, ևս մի քանի բացականեր ունենք: Ինչպես գիտեք արտասահմանից էլ հավաքականի անդամներ ունենք, նրանք են բացակայում, ու հիմա ընդհանուր առմամբ 25-26 հոգի ենք»,- ընդգծում է Հաբեթնակ Կուրղինյանը:
Մարզիչն ասում է՝ խստորեն հետևում են հակահամաճարակային կանոններին.
«Հյուրանոցի տարածքում բոլորս դիմակներով ենք, պահպանում ենք բոլոր այն կանոնները, որոնց դուք եք հետևում Երևանում: Ամեն առավոտ ու երեկո թիմը ջերմաչափվում է, ամեն ինչ հսկողության տակ է»:
Ծաղկաձորի հավաքը կավարտվի մեկ շաբաթից, իսկ թե դրանից հետո հավաքականն ինչ ծրագրով կշարունակի մարզումները, կախված կլինի որոշ հանգամանքներից.
«Այս տարվա մրցաշարերի հետ կապված դեռևս ոչ մի հստակություն չկա: Վերջնական որոշումը պարզ կլինի օգոստոսին, այս պահին դեռևս նախնական ցանկություն ու հայտ կա, բայց այդ հարցում հստակություն կմտցվի օգոստոսին: Դե իհարկե, ամեն ինչ կախված է վարակից. կարծում եմ՝ եթե այսպես մնա ու վարակի տեմպերը չնահանջեն, ապա աշխարհի և Եվրոպայի առաջնություններն էլ չեն կայանա: Հավանականությունն ըստ իս շատ քիչ է:
Եթե ունենանք հստակ օրացույցային պլան, թե երբ որ մրցաշարերը կկայանան, ըստ այդմ կհասկանանք մեր անելիքները: Իսկ եթե միջազգային մրցաշարերն ամեն դեպքում չանցկացվեն, կարծում եմ՝ ամիսը մեկ կամ 20 օրը մեկ կարելի է մեր երկրում, մասնավորապես հենց Ծաղկաձորում հավաքներ կազմակերպել, որպեսզի թիմը միասին լինի ու պահպանի թիմային ոգին: Չորս ամիս տղաները միասին չէին մարզվել, անկասկած դժվար էր»,- եզրափակում է իր խոսքը Հաբեթնակ Կուրղինյանը:
Հիշեցնենք՝ ազատ ոճայինների ծաղկաձորյան հավաքը կտևի մինչև հուլիսի 22-ը: Երեկ՝ հուլիսի 15-ին, Ծաղկաձորում հավաք պետք է սկսեր նաև հունահռոմեական ոճի ըմբշամարտի Հայաստանի հավաքականը, սակայն թիմում կորոնավիրուսի վարակման 3 դեպք է հայտնաբերվել ու մարզիչների որոշմամբ՝ հավաքը հետաձգվել է:
Նարե Հովհաննիսյան
