ՀԱՕԿ, թե՞ ՀԲՖ. ու՞մ կազմակերպած մրցաշարի արդյունքներն օրինական ուժ ունեն

ՀԱՕԿ-ի ու Հայաստանի Բռնցքամարտի ֆեդերացիայի միջև սրված հարաբերությունները բերեցին նրան, որ ամեն ինչ գլխիվայր շրջվել է:

ՀԱՕԿ-ը հայտարարեց, որ դեկտեմբերի 12-22-ը կանցկացնի «Կաշվե Ձեռնոց» մրցաշար, որի արդյունքների հիման վրա կձևավորվի հավաքականի կազմը, և այդ մարզիկները կմեկնեն առաջիկա վարկանիշային մրցաշարերին: Իր հերթին՝ Բռնցքամարտի ֆեդերացիան նոյեմբերի 18-22-ը կանցկացնի Հայաստանի առաջնություն, և ֆեդերացիայի նախագահի խոսքերով՝  հենց այդ մրցումների հիման վրա է կազմավորվելու հավաքականի կազմը:

Գլուխկոտրուկ, որի լուծումը տեսնելու համար դեռ պետք է սպասենք: Armsport.am-ը, զրուցել է բոլոր կողմերի հետ, լսել նրանց կարծիքներն ու տեսակետները, որոնք հաճախ լույս սփռելու փոխարեն ավելի խճճում են հասկանալու համար, թե ինչ զարգացումներ են հնարավոր մեր բռնցքամարտի աշխարհում։

«Տարվա կարևորագույն ստուգատեսը դա Հայաստանի առաջնությունն է, որի շնորհիվ կազմավորվում է Հայաստանի հավաքականը։ Հավաքականի անդամներն են մասնակցում միջազգային մրցաշարերին»,- վստահ է Բռնցքամարտի ֆեդերացիայի նախագահ Արթուր Գևորգյանը: Ըստ նրա ՀԱՕԿ-ն ու այլ հասարակական կազմակերպությունները կարող են կազմակերպել տարբեր միջոցառումներ և դա իրենց կողմից միշտ խրախուսելի է եղել, բայց երբեք այդ մրցումներում գրանցած արդյունքների հիման վրա չի կարող կազմավորել ազգային հավաքականը: «Այդ մրցումները ոչ մի կերպ չպետք է խանգարեն Հայաստանի Բռնցքամարտի ֆեդերացիայի կողմից կազմակերպած միջոցառումներին»,- շեշտում է Գևորգյանը:

Մյուս կողմից ՀԱՕԿ-ը պնդում է, որ իր կազմում Բռնցքամարտի ֆեդերացիա չկա և, հետևաբար, նրանք չեն կարող մարզիկ գործուղել օլիմպիական վարկանիշ տվող մրցաշարերին։ ՀԱՕԿ գլխավոր քարտուղար Հրաչյա Ռոտոմյանն Armsport.am-ի հետ զրույցում նշում է, որ «Կաշվե Ձեռնոց» մրցաշարի նպատակը մեկն է․ «Մենք ցանկանում ենք ամեն գնով զերծ մնալ տարբեր խոսակցություններից և ցանկանում ենք, որ ամեն ինչ արդար լինի. Վարկանիշային մրցաշարերին կգնան նրանք, ովքեր վաստակել են այդ իրավունքը»:

«Կաշվե Ձեռնոց» մրցաշարի անցկացումը Կրթության, գիտության, մշակույթի և սպորտի նախարարությունը, կարծես թե դիտարկում է, որպես բռնցքամարտում առաջացած խնդիրների լուծման ճանապարհներից մեկը։ Փոխնախարար Գևորգ Լոռեցյանը հավանություն է տալիս «Կաշվե Ձեռնոց»-ի անցկացմանը և հաստատում Հրաչյա Ռոստոմյանի խոսքերը. «ՀԱՕԿ-ի կազմակերպած մրցաշարի նպատակը ուժեղագույններին ի հայտ բերելն է, որոնք էլ կմեկնեն օլիմպիական վարկանիշ տվող առաջիկա մրցաշարերին: Մրցաշարին կարող են մասնակցել բոլոր ցանկացողները և նպատակն է, որ պահպանվի անաչառությունը և հետագայում հայկական բռնցքամարտի պատիվը բարձր պահվի Օլիմպիական խաղերում»:

Մինչ այդ Արթուր Գևորգյանը հույս ունի, որ նման իրավիճակում պետությունը պետք է սատար կանգնի Բռնցքամարտի ֆեդերացիային. «Պետությունը պետք է պետական քաղաքականության կրողը լինի և պետությունը պետք  է ամեն ինչ անի, որ իր հովանու տակ անցկացվող միջոցառումներն անցկացվեն ժամանակին և ոչ մի այլ միջոցառում չպետք է խանգարի: Եթե ՀԱՕԿ-ի կազմակերպած մրցաշարը դավադրություն է, ուրեմն ամեն ինչ շատ ավելի վատ է: ՀԱՕԿ-ն իրավունք չունի իր հովանու տակ կազմակերպած մրցաշարից բռնցքամարտիկ գործուղել օլիմպիական խաղեր»:

Գևորգ Լոռեցյանը համամիտ չէ Արթուր Գևորգյանի այն համոզման հետ, որ «Կաշվե Ձեռնոցի» արդյունքները իրավական ուժ չեն կարող ունենալ՝ օլիմպիական վարկանիշային մրցումների համար: «Այո, իհարկե ունի․․․ Ինչպես գիտեք ՄՕԿ-ը զրկեց AIBA-ին՝ Բռնցքամարտի միջազգային ֆեդերացիային, օլիմպիական վարկանիշ խաղարկելու հնարավորությունից։ Հետևաբար, ՀԱՕԿ-ը իրավունք ունի իր հովանու տակ անցկացնելու մրցաշար և ի հայտ բերելու ուժեղագույններին, ովքեր էլ կգնան վարկանիշային մրցաշարերին»,- իր փաստարկներն է ներկայացնում ԿԳՄՍՆ փոխնախարար Լոռեցյանը։

Արթուր Գևորգյանը համոզված է, որ իր փաստարկներն առավել համոզիչ են․ «Օլիմպիական խաղերի մասնակիցների ցուցակը ներկայացնում է ՀԱՕԿ-ը, բայց կազմը ընտրում է հավաքականի գլխավոր մարզիչը՝ մրցումների արդյունքների հիման վրա: ՀԱՕԿ-ը բռնցքամարտիկների մարզիչ չունի և կրկնում եմ, նրանք իրավասու չեն որոշել, թե ովքեր պետք է մեկնեն Օլիմպիական խաղեր: Իսկ եթե ՀԱՕԿ-ը որոշի նման կեղծ քայլի գնալ, ապա այդ պարագայում հնարավոր կլինի շոշափել մեր երկրի ողնաշարի ամրությունը»:

«Ժամանակն ամեն ինչ ցույց կտա, թե ով ինչ նպատակ ունի: Մեզ մոտ ոչ մի անձնական շահ  և արկածախնդրություն չկա: Վերջին ամիսներին մենք ունեցանք հաջողություններ այնպիսի բռնցքամարտիկների մասնակցությամբ, ովքեր, երբ ֆեդերացիան էր ընտրում կազմը, հավաքականի կազմում չէին: Ինչպես և մյուս մարզաձևերում, այստեղ էլ մեր ցանկությունը միայն դրական արդյունք ապահովելն է»,- մեզ հետ զրույցում հավելում է Հրաչյա Ռոստոմյանը:

Մինչ սպորտային կառույցները մրցավեճի մեջ են մտել, թե ով է այս պատմության մեջ առավել իրավասուն, դրանց հետևանքներն անմիջական իրենց վրա զգում են բռնցքամարտիկները։

Դրանցից մեկն ի հայտ է գալիս Արթուր Գևորգյանի հայտնած դժգոհություններից մեկում՝ կապված այս մրցաշարերի միջև կարճ դադարի հետ․ «Մրցաշարերի միջև պետք է գոնե մեկ ամիս դադար լինի, որպեսզի մարզիկներն առաջին հերթին վերականգնվեն: Մենք դիմել ենք Սպորտի նախարարությանը, որպեսզի նրանք  ապահովեն մրցաշարերի միջև առնվազն մեկ ամսվա ինտերվալը: Մարզիկները ֆիզիկապես պետք է հասցնեն վերականգնվել: Շատերը դրսում են ապրում, և նրանց համար լրացուցիչ դժվարություններ են ստեղծում»:

Ի՞նչ փուլում է նախարարությունում ֆեդերացիայի նամակ-առաջարկը՝ Գևորգ Լոռեցյանից բոլորովին այլ պատասխան ենք ստանում․«Նման բովանդակությամբ նամակ չենք ստացել, բայց վստահ եղեք, որ ստանալուն պես մեր մասնագիտական վարչությունը կզբաղվի այդ հարցով: Մեզ մոտ նամակներ չեն կորում»:

Հայտնի դեպքերից հետո պետությունը Կանանց աշխարհի առաջնության նախապատրաստական փուլի և  մրցաշարին մասնակցելու համար գումար չհատկացրեց: Գևորգյանը հավաստում է, որ իր կապերի միջոցով Ռուսաստանն է հովանավորել հայ բռնցքամարտիկների մասնակցությունն աշխարհի առաջնությանը․ «Դա խայտառակություն է: Չի կարելի բռնցքամարտիկների ճակատագրի հետ խաղալ, դա անթույլատրելի է: Այդ ամենից հետո մենք դատական հայց ներկայացրինք, և դատարանի որոշմամբ ֆինանսավորումը պետք է շարունակվեր, բայց ապարդյուն»:

Խոսելով բռնցքամարտի խնդիրների մասին՝ ՀԲՖ նախագահ Արթուր Գևորգյանը կրկին անդրադառնում է իր նախագահության շուրջ ծավալված պատմությանը․ «Չկա ինչ-որ մեկը, որ ոլորտում  ավելի լավ է հասկանում, քան ֆեդերացիայի կազմից ինչ-որ մեկը : Եղել են արդար ընտրություններ: Եթե ցանկանում էին ոմանք մասնակցել, թող գային ու մասնակցեին ընտրություններին: Իմ նախագահության օրոք ամենաշատ բռնցքամարտիկներն են մեկնել Օլիմպիական խաղեր. 2016թ-ին՝ 5 մարզիկ: Իսկ առաջիկա խաղերում վստահ եմ, որ 7 ուղեգիր կունենանք. 5 տղա և 2 աղջիկ: Աղջիկներն այս տարի փայլուն ելույթներ ունեցան ու վստահ եմ, որ առնվազն 2 աղջիկ կգործուղվի Օլիմպիական խաղեր: Ինձ բազմիցս ասել են, որ AIBA-ի թույլտվությամբ կրկին պետք է ընտրություններ կազմակերպվեն, բայց միայն խոսքեր են: Թող կազմակերպեն, և ևս իմ պարտքը կհամարեմ նորից մասնակցել ընտրություններին»:

Փաստն այն է, որ ՄՕԿ-ը որակազրկել է AIBA-ին՝ վերջինիս զրկելով նաև օլիմպիական վարկանիշ խաղարկելու հնարավորությունից: Սա կարող է թերևս հիմք լինել ՀԱՕԿ-ի համար կազմակերպելու ներքին առաջնություն և խաղարկելու ուղեգրեր դեպի օլիմպիական վարկանիշային մրցաշար: Կողմերն ունեն միմյանց հակասող կարծիք, և դժվար է հասկանալ, թե հանգուցալուծումն ինչպիսի՞ն է լինելու: Եվ չնայած նրան, որ բոլորի նպատակը նույնն է՝ ամեն ինչ անել, որպեսզի այս ամենի ընթացքում չտուժեն բռնցքամարտիկներն ու Հայաստանի բռնցքամարտի պատիվը, այնուամենայնիվ յուրաքանչյուրն ունի իր տեսլականը, և այն իրագործելու ճանապարհին դեռ բախումներ շատ կլինեն:

Արմեն Գարամյան