«Նոայի» գլխավոր մարզիչ Վադիմ Բորեցը «Ուրարտուի» նկատմամբ գավաթի կիսաեզրափակիչ պատասխան խաղում 2-1 հաշվով հաղթանակ տանելուց և եզրափակիչ դուրս գալուց հետո կիսվել է տպավորություններով։ Բորեցի խոսքով՝ իր թիմի համար եզրափակիչ դուրս գալը վերջին նպատակը չէր։ Նրանք պայքարելու են գավաթը հաղթելու համար։
«Մեզ համար բարդ հանդիպում ստացվեց, թեպետ մեկնարկը շատ լավ դասավորվեց մեզ համար։ Մենք գոլ խփեցինք ու վերահսկում էինք խաղի ընթացքը, բայց հեռացումը ազդեցություն թողեց։ Սակայն ուզում եմ շնորհակալություն հայտնել թիմին։ Թիմի ֆուտբոլիստները ամեն ինչ թողեցին դաշտում, և դա շատ հաճելի է։
Մենք առաջընթաց ենք գրանցում հոգեբանական առումով, այսինքն հաղթում ենք բարդ խաղերում։ Դա մեծ արժեք ունի»,-ասել է Բորեցը։
«Նոայի» գլխավոր մարզիչը գովասանքի խոսքեր է ուղղել նաև «Ուրարտուի» հասցեին՝ հավելելով, որ ուրախ է, որ իր թիմը հաղթահարեց բարձր որակավորումով ֆուտբոլիստներ ունեցող թիմի արգելքը ու հիմա եզրափակիչում է։
«Սա մեր վերջնական նպատակը չէր։ Կա դեռ եզրափակիչ։ Մեր բոլոր մտքերը այդ խաղի հետ են»,-ասել է Բորեցը։
