Ֆրանսիայի հավաքականի և «Բարսելոնայի» նախկին պաշտպան Սամուել Ումտիտին խստորեն քննադատել է «Ոսկե գնդակ» մրցանակաբաշխությունը՝ նշելով, որ այն կորցրել է իր իմաստն ու մեծ վնաս է հասցնում ֆուտբոլին։
Օրերս France Football-ը հրապարակեց տարվա լավագույն ֆուտբոլիստի կոչման 30 հավակնորդների անունները։ Մինչ այդ, Մադրիդի «Ռեալի» հարձակվող Կիլիան Մբապեն հայտարարել էր, որ անձամբ իրեն կտար այդ մրցանակը՝ հիմնվելով սեփական վիճակագրության վրա։ RMC Sport-ի եթերում Ումտիտին չի շրջանցել այս հայտարարությունը.
«Մբապեն ինքնավստահ մարդ է, բայց, թերևս, նրան պետք չէր այդ մասին խոսել։ Նա պետք է կենտրոնանա դաշտում կատարվող իրադարձությունների վրա։ Բոլորն են տեսնում նրա խփած գոլերն ու լավ խաղը, բայց եթե նրան հարցնես, թե ում կտար մրցանակը, նա կնշի իր անունը։ Ինձ, օրինակ, դա դուր չի գալիս։ Հարձակվողները պաշտում են «Ոսկե գնդակը», բայց ակնհայտ է, որ այն պարտադիր չէ, որ հենց նրան բաժին հասնի»,- նշել է պաշտպանը։
Աշխարհի 2018 թվականի չեմպիոնին զարմացրել է նաև հավակնորդների ցուցակը և ֆուտբոլիստների սևեռվածությունը անհատական նվաճումների վրա.
«Ցուցակում ընդգրկել են Խուլիան Կինյոնեսին, բայց ի՞նչ է նա արել Աշխարհի առաջնությունում (4 գոլ Մեքսիկայի կազմում, որը դուրս մնաց 1/8 եզրափակիչից — խմբ.)։ Երբ տեսա դա, մտածեցի՝ կատակ է։ Անկեղծ ասած, ես նույնիսկ չեմ էլ դիտելու այդ արարողությունը։ Հարձակվողների համար այն շահելը երազանք է, բայց արարողությունը կորցրել է ցանկացած իմաստ և վնասում է ֆուտբոլին, որը խիստ թիմային մարզաձև է։ Մարդիկ հիմա շատ ավելին մտածում են «Ոսկե գնդակ» շահելու, քան թիմային տիտղոսների մասին։
Կարող ես թիմիդ հետ հաղթել Չեմպիոնների լիգան, բայց մտածել միայն քո մասին։ Մենք նորից սկսել ենք խոսել միայն վիճակագրությունից, բայց դա բավարար չէ։ Ֆուտբոլը միայն թվեր չեն»։
Եզրափակելով իր խոսքը՝ Ումտիտին խոստովանել է, որ դադարել է հետաքրքրվել մրցանակով Լիոնել Մեսսիի և Կրիշտիանու Ռոնալդուի լավագույն տարիներից հետո.
«Նրանք անհավանական վիճակագրություն ունեին, և եթե անգամ խոշոր տիտղոս չէին նվաճում, դա այնքան էլ կարևոր չէր, քանի որ նրանց անցկացրած մրցաշրջաններն ուղղակի ցնցող էին։ Իսկ հիմա պարտադիր չէ առանձնացնել մեկ գերազանցող ֆուտբոլիստի»։
