Մյունխենի «Բավարիայի» և Անգլիայի ազգային հավաքականի հարձակվող Հարի Քեյնը, հոկտեմբերի 26-ին Լոնդոնում նվաճելով կարիերայի առաջին «Ոսկե գնդակը», միանգամից մի քանի պատմական նվաճման հեղինակ է դարձել։
33-ամյա անգլիացի ռմբարկուն քվեարկության արդյունքներով շրջանցեց Մադրիդի «Ռեալի» ֆրանսիացի հարձակվող Կիլիան Մբապեին (2-րդ տեղ) և կատալոնական «Բարսելոնայի» ու Իսպանիայի հավաքականի վինգեր Լամին Յամալին (3-րդ տեղ)։ Այս հաղթանակով Քեյնը վերջ դրեց մի շարք երկարատև դադարների համաշխարհային ֆուտբոլում.
Առաջին անգլիացին՝ վերջին 25 տարում. Քեյնը դարձավ 2001 թվականից ի վեր առաջին անգլիացի ֆուտբոլիստը, որն արժանանում է ամենահեղինակավոր անհատական մրցանակին։ Մինչ այս «Ոսկե գնդակ» էին նվաճել միայն չորս անգլիացիներ՝ Սթենլի Մեթյուզը (1956 թ.), Բոբի Չարլթոնը (1966 թ.), Քևին Քիգանը (1978, 1979 թթ.) և վերջինը՝ Մայքլ Օուենը (2001 թ.)։
Առաջինը «Բավարիայից»՝ 45 տարվա դադարից հետո. Մյունխենյան գրանդի ֆուտբոլիստները «Ոսկե գնդակ» չէին նվաճել հեռավոր 1981 թվականից ի վեր, երբ պատվավոր մրցանակը բաժին էր հասել Կառլ-Հայնց Ռումենիգեին (1980, 1981 թթ.)։ Քեյնը դարձավ ակումբի պատմության 4-րդ ֆուտբոլիստը, որը հասնում է այս բարձունքին՝ Գերդ Մյուլերից (1970 թ.), Ֆրանց Բեկենբաուերից (1972, 1976 թթ.) և Ռումենիգեից հետո։
Առաջինը Բունդեսլիգայից՝ 30 տարվա ընդմիջումից հետո. Վերջին անգամ Գերմանիայի առաջնությունը ներկայացնող ֆուտբոլիստը «Ոսկե գնդակ» էր ստացել 1996 թվականին, երբ հաղթող էր ճանաչվել Դորտմունդի «Բորուսիայի» և Գերմանիայի հավաքականի պաշտպան Մաթիաս Զամերը։ Ընդհանուր առմամբ, սա Բունդեսլիգայի պատմության 10-րդ «Ոսկե գնդակն» է։ Այս ցուցանիշով գերմանական առաջնությունը զիջում է միայն իտալական Ա Սերիային (18 մրցանակ) և իսպանական Լա Լիգային (24 մրցանակ)։
Պատմության 4-րդ ամենատարեց նորեկ դափնեկիրը. 33-ամյա Քեյնը դարձավ ֆուտբոլի պատմության մեջ չորրորդ ամենատարեց խաղացողը, որն առաջին անգամ է նվաճում «Ոսկե գնդակը»։ Իրենց առաջին մրցանակը ստանալու պահին նրանից տարիքով ավելի մեծ են եղել միայն Սթենլի Մեթյուզը 1956 թվականին (41 տարեկան, 321 օրական), Կարիմ Բենզեման՝ 2022-ին (34 տարեկան, 302 օրական) և Լև Յաշինը՝ 1963-ին (34 տարեկան, 56 օրական)։
