Մադրիդի «Ռեալի» գլխավոր մարզիչ Ժոզե Մոուրինյուն Չեմպիոնների լիգայի լիգայի փուլի առաջին տուրում Միլանի «Ինտերի» նկատմամբ տոնած հաղթանակից հետո «Սանտիագո Բեռնաբեուում» կիսվել է տպավորություններով՝ վերլուծելով թիմի խաղն ու ֆուտբոլիստների անհատական ելույթները։
«Այս հանդիպումը կարող էր ավարտվել մեր հաղթանակով՝ 5:1 կամ 6:1 հաշվով։ Բայց այն կարող էր նաև 6:6 ավարտվել։ Չեմ ուզում ասել, թե «Ինտերը» հաղթեց խաղային առումով, քանի որ մենք ավելի շատ պահեր ստեղծեցինք վճռորոշ դրվագներում, օրինակ՝ Ջուդի երկու հնարավորությունները։ Սա խելահեղ խաղ էր, իսկ ես չեմ սիրում նման խելահեղություն։ Գերադասում եմ խփել 5, 6 կամ 7 գնդակ՝ վերահսկելով ամեն ինչ, առանց դարպասապահի անհավանական ելույթի կարիքն զգալու։
Անկեղծ ասած, եթե այսօր լավագույն խաղացողի մրցանակը չտան Կուրտուային, ուրեմն ընտրություն կատարողը քնած է եղել (ծիծաղում է)։ Սա ասում եմ առանց արժեզրկելու Ֆեդե Վալվերդեի հսկայական աշխատանքը, ով ի վերջո ստացավ այն։
Վինին լավագույն մարզավիճակում չէ, և բոլորս դա տեսնում ենք։ Նա առաջինն է դա գիտակցում և քրտնաջան աշխատում է, որպեսզի կրկին դառնա հանդիպումների ելքը վճռող ֆուտբոլիստ։ Նա մեծածավալ աշխատանք կատարեց թիմի համար, իսկ երբ խաղացողն իրեն ամբողջությամբ նվիրում է դաշտում, ես՝ որպես մարզիչ, միշտ նրա կողքին եմ։ Կգա ժամանակը, և նա նորից կսկսի միայնակ վճռել խաղերի ելքը։
Ես չեմ մեկնաբանում տրիբունաների արձագանքը՝ ո՛չ այսօր, ո՛չ էլ մինչև իմ վերջին օրն այստեղ։ Երկրպագուների կարծիքը կարևոր է, բայց ես նրանց ոչինչ ասել չեմ կարող։ Սակայն երբ Մբապեին փոխարինեցին, ես նրան համբուրեցի. դա հարգանքի նշան էր թիմի համար նրա կատարած աշխատանքի նկատմամբ։ «Ռեալ Մադրիդում» պահանջներն ու սպասելիքները լրիվ այլ մակարդակի վրա են՝ ի տարբերություն այլ ակումբների։
Տրենտը մարտավարական տեսանկյունից հիանալի խաղաց և ճիշտ ընկալեց իր անելիքը՝ իմանալով, որ խաղում է իրեն ոչ այնքան հարազատ դիրքում։ Շնորհակալ եմ նրանից, ինչպես նաև Չուամենիից, ով դաշտ դուրս եկավ հսկայական դադարից հետո։
Ինչ վերաբերում է «Ինտերին», ապա նրանք բարձրակարգ թիմ են և, անկասկած, Իտալիայի լավագույն ակումբը։ Միայն «Ռոման» կարող է փոքր-ինչ մոտ լինել նրանց։ Նրանք հիանալի մարզիչ ունեն, ամուր կազմ և Չեմպիոնների լիգայում հաղթելու հավակնություններ»,- պորտուգալացի մասնագետի խոսքն է մեջբերում «Ռեալի» պաշտոնական կայքը։
Հիշեցնենք, որ Չեմպիոնների լիգայի հաջորդ տուրում «Ռեալը» կհյուրընկալվի «Ռոմային»։ Հանդիպումը նախատեսված է հոկտեմբերի 14-ին։
