Միլանի «Ինտերի» կիսապաշտպան Հենրիխ Մխիթարյանը Գերմանիայում ընթացող ուսումնամարզական հավաքի ժամանակ խոսել է նոր մրցաշրջանի սպասելիքների, թիմի հավակնությունների և իր ապագայի մասին։ Հայ ֆուտբոլիստը վստահ է, որ թիմն ի զորու է կրկնել նախորդ տարվա հաջողությունները։
Դոնաուեշինգենում լրագրողների հետ զրույցում Մխիթարյանը նշել է, որ «ներաձուրիները» շարունակում են մեծ նպատակներ հետապնդել։
«Մեր հավակնությունները մեծ են։ Ցանկանում ենք կրկին հաղթել առաջնությունում, նվաճել Իտալիայի գավաթն ու Սուպերգավաթը, ինչպես նաև հնարավորինս հեռուն գնալ Չեմպիոնների լիգայում։ Դրանք բարդ, բայց միանգամայն հասանելի նպատակներ են»,- նշել է կիսապաշտպանը։
Խոսելով միլանյան ակումբի հետ պայմանագիրը ևս մեկ տարով երկարաձգելու որոշման մասին՝ Մխիթարյանն ընդգծել է, որ դեռ շատ բան ունի տալու թիմին։
«Ակումբի ղեկավարության հետ խոսել եմ միայն «Բոլոնիայի» դեմ խաղից հետո, որից հետո արել եմ իմ գնահատականները։ Հասկացա, որ կարող եմ ևս մեկ տարի խաղալ այստեղ։ Սակայն սա ամենևին չի նշանակում, որ ես ավարտելու եմ կարիերաս 2027 թվականին։ Հիմա պետք է կենտրոնանանք այս առաջնության վրա, իսկ հետագա տարիների մասին կմտածենք ավելի ուշ»։
Մխիթարյանը նաև մեծ վստահություն է հայտնել գլխավոր մարզիչ Կրիստիան Կիվուի նկատմամբ՝ նշելով, որ նրանք մի մեծ ընտանիք են, և մարզիչը կարողանում է հաղթանակի քաղց փոխանցել խաղացողներին։
«Նա նախորդ տարի արդեն ապացուցել է, թե ինչի է ընդունակ։ Մենք նրան լիովին աջակցում ենք և ցանկանում ենք միասին հասնել մեր նպատակներին։ Ինչ վերաբերում է ինձ, ես այստեղ եմ թիմակիցներիս օգնելու համար և, ի հեճուկս տարիքիս, հուսով եմ, որ անհատական առումով ավելի լավ մրցաշրջան կանցկացնեմ, քան նախորդն էր»,- Մխիթարյանի խոսքն է մեջբերում Sky Italia-ն։
