Շաբաթ՝ մայիսի 23-ին, Լոնդոնի «Ուեմբլի» մարզադաշտում կայացավ Չեմփիոնշիփի փլեյ-օֆֆի եզրափակիչը, որտեղ վճռվում էր Անգլիայի Պրեմիեր լիգայի 2026/27 մրցաշրջանի վերջին ուղեգրի ճակատագիրը:
«Հալ Սիթին» 1-0 հաշվով դրամատիկ հաղթանակ տարավ «Միդլսբրոյի» նկատմամբ՝ ապահովելով իր վերադարձը անգլիական ֆուտբոլի բարձրագույն խումբ:
Հանդիպման ելքը վճռվեց հիմնական ժամանակին ավելացված վերջին րոպեներին: 90+5-րդ րոպեին «վագրերի» հարձակվող Օլիվեր Մակբերնին դիպուկ հարվածով հաղթանակ և ԱՊԼ-ի ուղեգիր պարգևեց իր թիմին:
Այս հաղթանակի շնորհիվ «Հալ Սիթին» Անգլիայի Պրեմիեր լիգա է վերադառնում ինը տարվա դադարից հետո: Վերջին անգամ թիմն այնտեղ հանդես է եկել 2016/17 մրցաշրջանում՝ վաստակելով 34 միավոր և զբաղեցնելով 18-րդ հորիզոնականը:
Հատկանշական է, որ ի սկզբանե եզրափակիչում «Հալ Սիթիի» մրցակիցը պետք է լիներ «Սաութհեմփթոնը»: Կիսաեզրափակիչում «Սաութհեմփթոնը» հաղթել էր «Միդլսբրոյին» (0-0, 1-2՝ լրացուցիչ ժամանակում), իսկ «Հալ Սիթին» առավելության էր հասել «Միլուոլի» նկատմամբ (0-0, 2-0):
Սակայն սկանդալային բացահայտումներից հետո «Սաութհեմփթոնը» որակազրկվեց և հեռացվեց մրցաշարից: Պատճառն այն էր, որ «սրբերին» մեղադրեցին կիսաեզրափակիչի առաջին խաղից առաջ «Միդլսբրոյի» մարզումային գործընթացին հետևելու և լրտեսելու մեջ: Որակազրկման արդյունքում փլեյ-օֆֆի եզրափակիչում «Սաութհեմփթոնի» տեղը զբաղեցրեց հենց նրանց կողմից տուժած «Միդլսբրոն»։
Հիշեցնենք նաև, որ Չեմփիոնշիփից ԱՊԼ-ի ուղիղ ուղեգրեր ավելի վաղ նվաճել էին «Քովենթրին» և «Իպսվիչը», իսկ Անգլիայի Պրեմիեր լիգայից դուրս էին մնացել «Բարնլին» և «Վուլվերհեմփթոնը»:
