Ժոաո Պեդրոն դարձել է «Բարսելոնայի» գլխավոր նպատակը՝ Ալվարեսի տրանսֆերի բարդությունների ֆոնին
Լոնդոնի «Չելսիի» հարձակվող Ժոաո Պեդրոն դարձել է կատալոնական «Բարսելոնայի» գլխավոր տրանսֆերային նպատակը՝ ամառային տրանսֆերային պատուհանի ընթացքում հարձակման գիծն ուժեղացնելու համար։ Այս մասին հայտնում է իսպանական հեղինակավոր Mundo Deportivo պարբերականը։
Աղբյուրի փոխանցմամբ՝ 24-ամյա բրազիլացի ռմբարկուի թեկնածությունն անձամբ հաստատել է «կապտանռնագույնների» սպորտային տնօրեն Դեկուն։
Կատալոնական ակումբի ներկայացուցիչներն արդեն կապ են հաստատել ֆուտբոլիստի շրջապատի հետ։ Նշվում է, որ այս տրանսֆերը իսպանական գրանդի վրա կարող է արժենալ մոտ 70 միլիոն եվրո։
Սկզբնական շրջանում «Բարսելոնայի» գլխավոր թիրախը Մադրիդի «Ատլետիկոյի» հարձակվող Խուլիան Ալվարեսն էր, որի համար ակումբը պատրաստ էր վճարել 100 միլիոն եվրո։ Սակայն գործարքը մտել է փակուղի. ՊՍԺ-ն արգենտինացու համար ավելի շահավետ առաջարկ է նախապատրաստել, իսկ մադրիդյան ակումբն էլ իր հերթին կտրականապես դեմ է ֆուտբոլիստին իսպանական այլ թիմ (առավել ևս՝ մրցակցի) բաց թողնելուն։
Հետաքրքիր է, որ ինքը՝ Ալվարեսը, նախապատվությունը տալիս է հենց «Բարսելոնա» տեղափոխությանը։
Ինչ վերաբերում է Ժոաո Պեդրոյին, ապա նա լոնդոնյան ակումբի գույները պաշտպանում է 2025 թվականից։ Նրա գործող պայմանագիրն անգլիական թիմի հետ նախատեսված է մինչև 2033 թվականի ամառը։
«Չելսիի» կազմում անցկացրած ընդհանուր 51 հանդիպումներում բրազիլացին արդեն հասցրել է դառնալ 23 գոլի և 9 գոլային փոխանցման հեղինակ։
