Մյունխենի «Բավարիայի» գլխավոր մարզիչ Վենսան Կոմպանին կիսվել է Չեմպիոնների լիգայի կիսաեզրափակիչի՝ ֆրանսիական ՊՍԺ-ի դեմ կայանալիք առաջին հանդիպման սպասելիքներով։
Բելգիացի մասնագետը բարձր է գնահատել մրցակցին և նրա գլխավոր մարզիչ Լուիս Էնրիկեի կատարած աշխատանքը՝ միաժամանակ ընդգծելով իր թիմի հաղթական տրամադրվածությունը։
«Երկու թիմերն էլ հսկայական կրեատիվություն ունեն թե՛ դիրքային խաղում, թե՛ լուծումներ գտնելու հարցում։ Ամեն ինչ կորոշեն մանրուքները, ինտենսիվությունն ու էներգիան։ Մենք միմյանց դեմ խաղալու ենք արդեն չորրորդ անգամ։ Նրանց դեմ խաղալու հարուստ փորձ ունենք, բայց դա վերաբերում է նաև մեր մրցակցին։
Լուիս Էնրիկեն անհավանական աշխատանք է կատարում։ Ինձ համար անակնկալ չէր, որ նրանք հաղթեցին Չեմպիոնների լիգայում։ Նրա թիմերում միշտ նկատելի է իսկական թիմային ոգի. ֆուտբոլիստները վազում են և անմնացորդ պայքարում»։
Անդրադառնալով դիմակայության ելքին՝ «Բավարիայի» մարզիչն ընդգծել է, որ կախարդական լուծումներ չկան, և ամեն ինչ կախված է ճիշտ ճնշում գործադրելու կարողությունից.
«ՊՍԺ-ն կարող է խաղադաշտում տարբեր կերպ գործել, բայց դա մեզ համար անակնկալ չի լինի։ Նրանք բարձրակարգ խաղացողներ ունեն յուրաքանչյուր դիրքում, բայց մենք նույնպես չենք զիջում որակով։ Այս տարի մենք արդեն հաղթել ենք «Սանտյագո Բեռնաբեուում» և հաղթանակ ենք տոնել նաև Փարիզում։ ՊՍԺ-ն, անկասկած, Չեմպիոնների լիգայի գործող գավաթակիրն է, սակայն եթե կա մի թիմ, որն ի զորու է ընդունել այս մարտահրավերը, ապա դա հենց մենք ենք: Մենք գիտենք՝ որքան ուժեղ է մրցակիցը, բայց ցանկանում ենք հաղթել այս խաղում», — բելգիացի մասնագետի խոսքերն է մեջբերում ՈւԵՖԱ-ի պաշտոնական կայքը։
Չեմպիոնների լիգայի կիսաեզրափակիչի ՊՍԺ – «Բավարիա» առաջին հանդիպումը կկայանա այսօր՝ ապրիլի 28-ին։ Մեկնարկային սուլիչը կհնչի Երևանի ժամանակով՝ 23:00-ին։ Թիմերի միջև պատասխան հանդիպումը նախատեսված է չորեքշաբթի՝ մայիսի 6-ին։
