Մադրիդի «Ռեալի» հարձակվող Վինիսիուս Ժունիորը Չեմպիոնների լիգայի քառորդ եզրափակչի՝ Մյունխենի «Բավարիայի» դեմ խաղից առաջ կիսվել է սպասելիքներով, խոսել Կիլիան Մբապեի հետ համագործակցության, ինչպես նաև Խաբի Ալոնսոյի և Ալվարո Արբելոայի հետ աշխատանքի մասին։
«Բավարիայի» դեմ խաղի և երկրպագուների մասին
«Ամենակարևորը ֆուտբոլիստների և երկրպագուների միջև կապն է, ինչը միշտ փոխում է տնային հանդիպումների դինամիկան Չեմպիոնների լիգայում։ «Բավարիան» հիանալի թիմ է, որն այս մրցաշրջանում շատ քիչ է պարտվել, բայց մենք պատրաստ ենք և մեծ փորձ ունենք նման խաղերում»։
Խաբի Ալոնսոյի և Ալվարո Արբելոայի հետ աշխատանքի մասին
«Ալոնսոյի օրոք բարդ շրջան էր, քանի որ քիչ էի խաղում։ Մենք չկարողացանք գտնել այն կապը, որն անհրաժեշտ էր, բայց ես շատ բան սովորեցի դրանից: Հիմա Արբելոայի հետ հիանալի փոխհարաբերություններ ունեմ, նա ինձ վստահություն է ներշնչում, ինչպես ժամանակին անում էր Կառլո Անչելոտին։ Սա իմ կյանքի ակումբն է, և ես առավելագույնն եմ տալիս խաղադաշտում»։
Կիլիան Մբապեի հետ համագործակցության մասին
«Մարդիկ շատ բան են խոսում, բայց Մբապեն մեզ միշտ վստահություն և գոլեր է ապահովում: Նա աշխարհի լավագույն ֆուտբոլիստներից է: Մենք շատ լավ կապ ունենք ինչպես խաղադաշտում, այնպես էլ դրա սահմաններից դուրս, և շարունակելու ենք միասին պայքարել այս ակումբի համար»։
«Էլ Կլասիկոյում» փոխարինվելուց հետո դրսևորած պահվածքի մասին
«Այդ զայրույթը տհաճ դրվագ էր։ Ես ներողություն եմ խնդրել թիմից, ակումբից, մարզչից և երկրպագուներից։ Ես սխալ էի. երիտասարդ եմ՝ 25 տարեկան, ուզում եմ միշտ խաղալ, բայց պետք է կարողանամ զսպել էմոցիաներս։ Ուզում եմ կատարելագործվել և լավագույն օրինակը լինել երեխաների համար»։
Էդեր Միլիտաոյի վերադարձի մասին
«Շատ ուրախ եմ, քանի որ նա իմ լավագույն ընկերներից է և, անկասկած, աշխարհի լավագույն կենտրոնական պաշտպանը։ Նրա և վնասվածքներից ապաքինված մյուս տղաների (Բելինգհեմ, Մենդի, Սեբալյոս) վերադարձով մենք շատ ավելի ուժեղ և միասնական ենք մրցաշրջանի վճռորոշ հատվածից առաջ»։
