Արգենտինայի ազգային հավաքականի նախկին հարձակվող Գաբրիել Բատիստուտան անդրադարձել է լեգենդար Դիեգո Մարադոնայի մահվան հանգամանքներին՝ կիսվելով իր ցավով ու մտահոգություններով։
«Դիեգոն բարդ, բայց մեծ մարդ էր։ Ես միշտ աշխատում էի նրան ճշմարտությունն ասել, և գուցե հենց դրա համար էր նա ինձ հարգում։ Նա մահացավ շան պես՝ բոլորից լքված. դա պարզապես խայտառակություն է։ Մենք շատ քիչ բան արեցինք նրան պաշտպանելու համար։ Ես ինքս ինձ մեղադրում եմ, քանի որ կարող էի օգնել նրան»,- նշել է Բատիստուտան։
Անվանի նախկին ֆուտբոլիստի խոսքով՝ երբ սիրում ես մարդուն, պարտավոր ես աջակցել նրան դժվար պահին. «Ինչո՞ւ ոչ։ Թեև նրա հետ բարդ էր, բայց այս ամենը շատ տխուր է և ծանր նստվածք է թողնում»։
Բատիստուտան նաև զուգահեռներ է տարել ժամանակակից ֆուտբոլի գլխավոր աստղերից մեկի՝ Լիոնել Մեսսիի հետ.
«Հուսով եմ՝ Մեսսիի հետ նման բան չի պատահի… Երբ նրանք գագաթնակետին են, չի երևում, որ խնդիրներ ունեն։ Թվում է՝ ամեն ինչ ունեն ու ամեն ինչ լավ է։ Նրանք սուպերհերոսների են նման, բայց իրականում պարզապես մարդիկ են», — Բատիստուտայի խոսքերն է մեջբերում AS-ը։
Հիշեցնենք, որ Դիեգո Մարադոնան կյանքից հեռացել է 2020 թվականի նոյեմբերի 25-ին՝ 60 տարեկանում։ Մահվան պատճառը քրոնիկ սրտային անբավարարության սրման հետևանքով առաջացած թոքերի սուր այտուցն էր։
Արգենտինացի լեգենդը 1986 թվականի աշխարհի չեմպիոնն է, իսկ 1990-ին դարձել է ԱԱ-ի արծաթե մեդալակիր։ Արգենտինայի հավաքականի կազմում նա անցկացրել է 84 հանդիպում՝ դառնալով 32 գոլի և 27 արդյունավետ փոխանցման հեղինակ։ Ակումբային մակարդակում Մարադոնան պաշտպանել է «Արխենտինոս Խունիորսի», «Բոկա Խունիորսի», «Բարսելոնայի», «Սևիլիայի», «Նապոլիի» և «Նյուելս Օլդ Բոյզի» գույները։
