Իսպանական ֆուտբոլում հերթական սկանդալն է հասունանում։ Իսպանիայի առաջնության երկրորդ դիվիզիոնը ներկայացնող 33-ամյա մրցավարը ձերբակալվել է մարմնավաճառի նկատմամբ սեռական բռնություն գործադրելու և ոստիկան ներկայանալու մեղադրանքով: Իսպանիայի Թագավորական ֆուտբոլի ֆեդերացիան (RFEF) անհապաղ արձագանքել է միջադեպին՝ անորոշ ժամկետով հեռացնելով արբիտրին պարտականությունների կատարումից:
Ինչպես հաղորդում է El Comercio-ն, միջադեպը գրանցվել է Խիխոն քաղաքում։ Մրցավարը հանդիպել է մարմնավաճառի և նրան հարկադրել սեռական ակտի՝ հրաժարվելով վճարել մատուցված ծառայությունների դիմաց։ Կնոջը վախեցնելու նպատակով նա ներկայացել է որպես իրավապահ մարմինների աշխատակից՝ սպառնալով հետաքննություն սկսել երկրում նրա անօրինական բնակվելու փաստով։ Որպես ապացույց՝ տղամարդը նույնիսկ ոստիկանի կեղծ փաստաթղթեր է ցուցադրել:
Իրավապահները կասկածյալին հայտնաբերել են հեռախոսահամարի միջոցով, որով նա կապվել էր տուժողի հետ, իսկ վերջինս լուսանկարով անմիջապես ճանաչել է նրան։ Թեև մրցավարը հերքել է իր ներկայությունը դեպքի վայրում, անվտանգության տեսախցիկների ձայնագրությունները հաստատել են նրա մուտքը տվյալ շինություն։ Ավելին, աստուրիացի արբիտրի բնակարանում կատարված խուզարկությամբ հայտնաբերվել են Ազգային ոստիկանության և Քաղաքացիական գվարդիայի համազգեստ ու տարբերանշաններ:
Գործի քննությունը Խիխոնից արդեն փոխանցվել է Մադրիդ, որտեղ մշտապես բնակվում է տուժողը։ Ոստիկանությունն այժմ փորձում է պարզել՝ արդյոք կան նմանատիպ այլ դեպքեր և հնարավոր այլ տուժողներ, որոնք լռել են երկրից արտաքսվելու վախից։
Այս պահին մրցավարը գրավի դիմաց ազատ է արձակվել։ Նրա անունը չի հրապարակվում՝ նախաքննական գաղտնիքից ելնելով։ Իսպանիայի ֆուտբոլի ֆեդերացիան իր հերթին սկսել է ներքին ծառայողական քննություն։
