Իտալիայի գավաթի խաղարկության քառորդ եզրափակչում «Ինտերը» Մոնցայի «U-Power» մարզադաշտում 2։1 հաշվով առավելության հասավ «Տորինոյի» նկատմամբ՝ նվաճելով կիսաեզրափակչի ուղեգիր։
Հանդիպման ավարտից հետո միլանյան ակումբի ներկայացուցիչ Քրիստիան Կիվուն ամփոփել է խաղը և խոսել թիմի երիտասարդ ֆուտբոլիստների ու առաջիկա ծրագրերի մասին։
«Գոհ եմ ցուցադրած խաղից և տղաների նվիրումից։ Նման հանդիպումներում կարևոր է էներգիայի պահպանումը, և մենք կարողացանք ստեղծել այն, ինչ պլանավորել էինք։ Բնական է, որ խաղավերջում որոշակի անկում նկատվեց. 2։1 հաշվի ժամանակ մրցակիցը զգաց հավասարեցնելու հնարավորությունը և մեծացրեց ճնշումը, սակայն լուրջ խնդիրներ մեզ համար չստեղծեց։
Կարևորը արդյունքն է, և նպատակն իրագործված է։ Մենք ցանկանում ենք լինել մրցունակ և շարունակել այն աշխատանքը, որը կատարում ենք վերջին տարիներին։ Առաջ ենք շարժվում վստահությամբ՝ գիտակցելով, որ միշտ էլ կատարելագործվելու տեղ կա»,- ասել է Կիվուն։
Անդրադառնալով կազմի ընտրությանն ու երիտասարդ ֆուտբոլիստներին՝ մասնագետը նշել է.
«Կազմն ընտրելիս հաշվի ենք առել, թե ով է առավել թարմ՝ աչքի առաջ ունենալով նաև հունվար ամսվա ծանրաբեռնվածությունը։ Ուզում եմ առանձնահատուկ շնորհավորել երիտասարդական սեկտորին։ Խոսքը ոչ միայն խաղադաշտ դուրս եկած Կոկկիի և Կամատեի մասին է, այլև պահեստայինների նստարանին հայտնված մյուս տղաների՝ Բովոյի, Բերենբրուխի, Տոպալովիչի և Ալեքսիուի։
Հատուկ գովասանքի է արժանի Ստեֆանո Վեկկին, ով հիանալի աշխատանք է տանում Մ-23 թիմի հետ՝ ֆուտբոլիստներին պատրաստելով մեծ ֆուտբոլի համար»:
Խոսելով մրցաշրջանի խիտ գրաֆիկի և ակումբի նպատակների մասին՝ Կիվուն ընդգծել է.
«Ինձ երբեք չի անհանգստացնում խաղերի առատությունը, ես սիրում եմ այս գրաֆիկը։ «Ինտերի» նման ակումբում ամբիցիան անհրաժեշտություն է, բայց այն չպետք է վերածվի մոլուցքի։ Մոլուցքը ծնում է սպասելիքներ, իսկ սպասելիքները՝ հիասթափություն։ Մենք շարժվում ենք քայլ առ քայլ՝ աշխատելով միշտ պատրաստ լինել»:
