Իսպանիայի գավաթի խաղարկության 1/8 եզրափակիչում գրանցվեց իսկական սենսացիա՝ և միևնույն ժամանակ Մադրիդի «Ռեալի» համար իսկական մղձավանջ։ «Ալբասետեն» պատմություն կերտեց՝ պայքարից դուրս թողնելով «Արքայական ակումբին» (3:2), որն անցկացնում էր իր առաջին հանդիպումը նորանշանակ գլխավոր մարզիչ Ալվարո Արբելոայի գլխավորությամբ։ Հանդիպման հերոս դարձավ Ժեֆտեն՝ դառնալով դուբլի հեղինակ և հաղթական գոլը խփելով 94-րդ րոպեին։
Իսպանական մամուլը և փորձագետները կոշտ քննադատության են ենթարկել «Ռեալին»՝ որակելով թիմին «անհոգի», իսկ կատարվածը՝ «պատմական խայտառակություն»։
«Խաբի Ալոնսոյի հեռացումը՝ ֆուտբոլիստների հաղթանա՞կ»
El Larguero-ի եթերում Ալվարո Բենիտոն ուշադրություն է հրավիրել թիմում տիրող մթնոլորտի և նախկին մարզչի՝ Խաբի Ալոնսոյի հեռացման պատճառների վրա։
«Շատ դժվար էր մեկ օրում էական փոփոխություններ ակնկալել։ Բայց այն, ինչ պետք է լիներ մարզչական փոփոխության հետ, էներգիան է և թարմացված հույսերը։ Մտահոգիչ է․ կա՛մ մակարդակը չի հերիքում, կա՛մ խաղացողներից շատերը իրենց մակարդակից ցածր են հանդես գալիս։
Կարծում եմ՝ Խաբի Ալոնսոյի պաշտոնանկությունը ֆուտբոլիստների հաղթանակն էր։ Նրանք զգում են, որ իրենց ոճ կամ պարտականություններ պարտադրել հնարավոր չէ։ Խաբին հաջողության էր հասել «Բայերի» պես թիմում՝ ագրեսիվ, դինամիկ և կարգապահ ֆուտբոլով։ Նա չկարողացավ դա վերարտադրել այստեղ, քանի որ որոշ ֆուտբոլիստներ հրաժարվում էին կամ ի վիճակի չէին կատարել պահանջները։ Սա գլոբալ պարտություն է։ Հիմա ո՞վ է ստիպելու այս խաղացողներին կամ համոզելու, որ մրցունակ լինելու ճանապարհն այլ է», — նշել է Բենիտոն։
Լիդերների բացակայությունն ու «սկսնակների ակումբը»
«Ռեալի» նախկին ֆուտբոլիստ Պրեդրագ Միյատովիչը նշել է, որ թիմում բացակայում է «հին գվարդիան», որը կարող էր ձեռքն առնել ղեկը ճգնաժամային պահին։
«Ես ավելի հանգիստ կլինեի, եթե հանդերձարանում լինեին Կրոսը, Մոդրիչը կամ Ռամոսը՝ առաջատարներ, ովքեր կուղղորդեին երիտասարդներին։ Հիմա սա մի թիմ է, որը չունի կոնկրետ լիդեր՝ անկախ նրանից մարզիչը Խաբին է, թե Արբելոան։ Եթե այդպիսի կերպար չգտնվի, մենք շատ խնդիրներ կունենանք»։
AS-ի լրագրող Թոմաս Ռոնսերոն էլ ավելի կոշտ է արտահայտվել՝ թիմի կառավարումը համեմատելով սկսնակների հետ։
«Մենք նման ենք սկսնակների ակումբի։ Կառավարումը ցածր մակարդակի վրա է։ Եվ մենք դրա գինը վճարում ենք երեք օրում երկու տիտղոս կորցնելով։ Վատ որոշումներ, խղճուկ տրանսֆերներ և որբության զգացում, քանի որ չկա առաջնորդություն։ Բոլոր ոլորտներում։ «Ռեալը» պատմական խայտառակություն գրանցեց»։
Ռոնսերոն նաև հավելել է․ «Խնդիրն այն է, որ 14-րդ և 15-րդ Չեմպիոնների լիգայի գավաթներից հետո կարևոր ֆուտբոլիստներ հեռացան, իսկ նրանց փոխարինեցին միջակություններով։ Կամավինգան, Ալաբան՝ իր վնասված ծնկով, Լունինը, ով երկու գոլ «կերավ»… Դաշտի կենտրոնում չունենք մեկին, ով գլուխը բարձր կխաղա և որակ կապահովի»։
«Ամենավատ «Ռեալը», որը հիշում եմ»
Մանու Կարենյոն El Larguero-ի եթերում ընդգծել է, որ խնդիրը միայն մարզչի մեջ չէ․
«Սա մարզչական խնդիր չէ։ Սա ամենավատ «Ռեալ Մադրիդներից» մեկն է, որ ես հիշում եմ երկար տարիների ընթացքում։ Մարզչի փոփոխության օրը, երբ թիմը պետք է կռիվ տա տիտղոսի համար, չկա ոչ մի ռեակցիա՝ ո՛չ խաղային, ո՛չ էմոցիոնալ առումով։ Սա աղետ է, և արյունահոսությունը չի դադարում»։
Արբելոան՝ պատասխանատվության և ողբերգության մասին
Ինքը՝ Ալվարո Արբելոան, խաղից հետո փորձել է պաշտպանել ֆուտբոլիստներին և մեղքը վերցնել իր վրա։
«Այս ակումբում ոչ-ոքին արդեն ողբերգություն է, պատկերացրեք՝ ինչ է նման պարտությունը։ Պատասխանատուն ես եմ, քանի որ որոշումները ես եմ կայացրել։ Ես միայն կարող եմ շնորհակալություն հայտնել տղաներին ջանքերի համար։ Այստեղից պետք է միայն բարելավել խաղը և պատրաստվել շաբաթ օրվա հանդիպմանը», — նշել է նորանշանակ մարզիչը։
«Ալբասետեի» երազանքն ու «Ռեալի» իրականությունը
Մինչ Մադրիդում սուգ է, «Ալբասետեի» հերոս Ժեֆտեն չի թաքցրել իր ուրախությունը․
«Սա այն է, ինչ երազում ես փոքր ժամանակ։ Ես շատ երջանիկ եմ իմ թիմի համար, որն աշխատեց «շան պես», որպեսզի դուրս թողնի աշխարհի լավագույն թիմերից մեկին։ Ինը տարի առաջ ես ուզում էի թողնել ֆուտբոլը, իսկ այսօր տեսեք՝ որտեղ ենք»։
