Մադրիդի «Ռեալի» գլխավոր մարզիչ Ալվարո Արբելոան մամուլի ասուլիս է տվել «Ալբասետեից» կրած պարտությունից հետո, որի հետևանքով «Արքայական ակումբը» դուրս մնաց Իսպանիայի գավաթի խաղարկությունից։
«Այս ակումբում նույնիսկ ոչ-ոքին ողբերգություն է համարվում, պատկերացրեք՝ ինչ է նշանակում նման պարտությունը։ Վստահ եմ՝ մեր երկրպագուները նույնպես հիասթափված են։ Գիտակցում ենք իրավիճակի բարդությունը, և այստեղից միայն մեկ ելք կա՝ բարելավել խաղը։ Պատասխանատուն ես եմ, քանի որ որոշումները՝ ներառյալ փոփոխությունները, ես եմ կայացրել… Միայն կարող եմ շնորհակալություն հայտնել տղաներին ջանքերի համար և փորձել վերականգնել նրանց տրամադրությունը։ Համոզված էի, որ հայտացուցակը ճիշտ էր ընտրված, և հիմա էլ նույն կարծիքին եմ։ Մենք հիանալի թիմ ունենք, բացառիկ կազմ և տարբերություն ստեղծող ֆուտբոլիստներ։ Նրանց համար էլ հեշտ չէ։ Ես նորից նույն կերպ կվարվեի»։
Հնարավոր ձախողման մասին «Ձախողու՞մ։ Ես չեմ վախենում դրանից։ Հասկանում եմ նրանց, ովքեր ցանկանում են դա այդպես որակել։ Եթե ինչ-որ բան սովորել եմ, ապա դա այն է, որ ձախողումը հաջողության տանող ճանապարհն է, այն մեզ ավելի լավը կդարձնի։ Կյանքիս ընթացքում շատ ձախողումներ եմ ունեցել և բազմիցս դուրս մնացել պայքարից»։
Բարելավման ենթակա կողմերը «Պարտվելը «Ռեալում» երբեք թեթևություն չի բերում։ Ժամանակ ունենք աշխատելու համար։ Ֆիզիկական պատրաստվածության առումով բարելավելու շատ տեղ ունենք, Պինտուսն այդտեղ է դրա համար, որպեսզի վերականգնենք թիմի լավագույն ֆուտբոլային որակները»։
Խաղացողների վերաբերմունքը «Տեսա ֆուտբոլիստների, ովքեր ցանկանում էին հաղթել, պայքարում էին, և նրանց վերաբերմունքի մեջ ոչ մի մեղադրելու բան չկա։ Գիտենք պահանջները և քնելու ենք գնում ցավը սրտներումս»։
Վինիսիուսի մասին «Դրական էր տեսնել, թե ինչ իրավիճակից է նա վերադարձել, նրա ջանքերը, ցանկությունը՝ լինել այստեղ, խաղալ իր րոպեներն ու չթաքնվել։ Սա այն Վինիսիուսն է, որին ես ուզում եմ տեսնել։ Կլինեն ավելի փայլուն, կլինեն ավելի վատ օրեր, բայց այս Վինիսիուսն ավագ է, և սա այն խաղացողն է, որին ես ուզում եմ տեսնել»։
Մթնոլորտը հանդերձարանում ««Ռեալի» ցանկացած ֆուտբոլիստ շատ պահանջկոտ է ինքն իր նկատմամբ։ Հանդերձարանում ոչ ոք գոհ չէր։ Վաղը կլինենք Վալդեբեբասում՝ շաբաթ օրվա խաղին նորից տրամադրվելու համար»։
Ապագայի և պատասխանատվության մասին «Ես շատ անգամներ եմ պարտվել։ Այստեղ չեմ իմ ռեզյումեն հարստացնելու համար, այլ ակումբին օգնելու և ավելի շատ տիտղոսներ նվաճելու, այլ ոչ թե նրա համար, որ ինձ համարեն ավելի լավ կամ վատ մարզիչ։ Ես փորձեցի այլ բաներ պահանջել, և պետք է հասկանալ համատեքստը։ Ընդունում եմ իմ ամբողջական պատասխանատվությունը։ Սա իմ պաշտոնն է, և երբ թիմը վատ է խաղում, նշանակում է՝ այս խաղացողների հետ ես չկարողացա ավելի լավը անել»։
