«Բարսելոնայի» փորձառու հարձակվող Ռոբերտ Լևանդովսկու ապագան մնում է անորոշ։ Կատալոնական ակումբը կարող է որոշել լեհ ֆուտբոլիստին նոր պայմանագիր չառաջարկել և փոխարենը այս ամռանը նոր հարձակվողի հետ պայմանագիր կնքել։ Այնուամենայնիվ, Լևանդովսկու վերաբերյալ վերջնական որոշումը կկայացվի ավելի ուշ։
Իսպանական Sport պարբերականը, հղում անելով լեհ լրագրող Մատեուշ Շվյենցիցկիին, հաղորդում է, որ Լևանդովսկին կարող է կարիերան շարունակել Մադրիդի «Ատլետիկոյում»։
Մադրիդցիների գլխավոր մարզիչ Դիեգո Սիմեոնեն բարձր է գնահատում 37-ամյա լեհի խաղային որակները։
««Միլանը» հնարավոր տարբերակ է, բայց ես ունեմ մի տեսություն, որ Լևանդովսկին մեկ մրցաշրջան կանցկացնի «Ատլետիկոյում»։ Նա կարող է հաջողության հասնել Սորլոթի հետ, իսկ «Ատլետիկոն» ավելի վաղ արդեն նմանատիպ պայմանագրեր է կնքել Դավիդ Վիլյայի և Լուիս Սուարեսի հետ։ Բացի այդ, կան անձնական հարցեր, որոնք պետք է լուծվեն»,- նշել է լեհ լրագրողը։
Ռոբերտ Լևանդովսկին, ըստ լուրերի, նախընտրում է մնալ «Բարսելոնայում», նույնիսկ երկրորդական դերում և աշխատավարձի կրճատման դեպքում։ Եթե նա հեռանա, նրա առաջնահերթությունը կլինի կարիերան շարունակել Եվրոպայում։
