Ռուսական ֆուտբոլում հայտնի է դարձել «Տարվա ջենթլմեն» մրցանակի թեկնածուների ցանկը, որում ընդգրկվել է նաև Հայաստանի ազգային հավաքականի կիսապաշտպան և «Կրասնոդարի» ավագ Էդուարդ Սպերցյանը։
Այս հեղինակավոր մրցանակը, որը 1994 թվականից կազմակերպում է «Կոմսոմոլսկայա պրավդան», համարվում է ռուսական ֆուտբոլի ամենապատվավոր տիտղոսներից մեկը։ Այն շնորհվում է ոչ միայն խաղադաշտում ցուցաբերած գերազանց խաղի, այլև խաղից դուրս օրինակելի վարքագծի և արժեհամակարգի համար։ Մրցանակի խորհրդանիշը հատուկ կարած սև կոստյումն է, որը հաղթողը կրում է ամեն տարի։ 2025 թվականը նշանավորում է մրցանակի 30-ամյակը։
Էդուարդ Սպերցյանը, ով եղել է «Կրասնոդարի» պատմության առաջին չեմպիոնության գլխավոր կառուցողներից մեկը, առանձնացել է ոչ միայն խաղադաշտում իր առաջնորդական հատկանիշներով, այլև որպես ակումբի նոր դարաշրջանի խորհրդանիշ։ Նրա թեկնածությունն առանձնանում է մյուս մրցակիցների շարքում, որոնց թվում են ռուսական առաջատար ակումբների ֆուտբոլիստներ՝ Ստանիսլավ Ագկացիև, Անդրեյ Մոստովոյ, Իգոր Դիվեև, Իվան Օբլյակով, Իվան Սերգեև, Ալեքսանդր Մաքսիմենկո, Ռոնալդո, Դմիտրի Վորոբյով, Գեորգի Շելիա, Գամիդ Ագալարով, Սոլտմուրադ Բակաև, Վյաչեսլավ Գրուլյով և Յուրի Դյուպին։
Մրցանակաբաշխությունն անցկացվելու է երկու փուլով. նախ երկրպագուները կընտրեն լավագույն եռյակը, ապա հայտնի մարզիչներից և սպորտային լրագրողներից կազմված ժյուրին կորոշի հաղթողին։
Հիշեցնենք, որ 2024 թվականին մրցանակը ստացել էր Մոսկվայի «Դինամոյի» և Ռուսաստանի հավաքականի հարձակվող Կոնստանտին Տյուկավինը։
Քվեարկելու համար սեղմեք ԱՅՍՏԵՂ
